Naalakkersuisoq: Disko Linep inissilluarnissaanut periarfissinneqarli
Naalakkersuisorli Martha Lund Olsen politikereqatiminut maanna kaammattuuteqalerpoq, angallannermi sullissisut inissilluarnissaannut periarfissinneqarnissaat kaammattuutigalugu.
Angallannermi kiffartuussinissamut isumaqatigiissutit, pingaartumik Disko Linemik isumaqatigiissut matumani eqqarsaatigineqarluni isornartorsiorneqartunut ilaapput. Anthon Frederiksenimi, Partii Naleqqameersup, Kanukokallu siulittaasua Simon Simonsen, Inuit Ataqatigiillu sinnerlugit Inatsisartunut ilaasortaq Ane Hansen, isornartorsiuisunut ilaapput.
AAMMA ATUARUK Disko Line lover bod og bedring
Ane Hansenillu isornartorsiuinera Martha Lund Olsenip pingaarnertut oqaaseqarfigaa. Ane Hansenip oqallissaarinera Martha Lund Olsenip nuannaarutigaa, imatulli aamma akissuteqarfigalugu:
- Disko Linep kiffartuussineranut isumaqatigiissut sapaatip-akunneri pingasut inorlugit pisoqaassuseqarpoq. Sullissisut sullississummik atuutsitsilernissamut ullut ikittuaraannaat atortariaqarsimavaat, taamaattumillu Disko Linep suliassani naammassisinnaanerai pillugit pisuutitsissutinik saqqummiussissalluni siusippallaarpoq, Naalakkersuisoq tusagasiuutinut nalunaarummi ilaatigut taama allaaserisaqarpoq.
AAMMA ATUARUK Takornariakinnerulernissaq ingerlatsisut aarlerigaat
Disko Linep inissilluarnissaanut periarfissinneqartariaqarnera taamaammat kaammattuutigaa.
2017-imut aningaasanut inatsisip Inatsisartuni qaammatit marluk matuma siornatigut isumaqatigiissutigineqarnera, Martha Lund Olsenip eqqaasitsissutigaa, kiffartuussinissamut isumaqatigiissutit aningaasanut inatsimmut ilanngullugit aalajangiiffigineqarnerat eqqaasitsissutigalugu, aningaasallu inuiaqatigiinnik sullissinermi atorneqartussat agguaanneqareersut, soorlu atornerluisunut katsorsaavinnut, ilinniartunut inissiat paasiniaasarfiillu.
- Taamaattumik najoqqutassaq, Naalakkersuisuniinnaanngitsoq, aammali Inatsisartunit - akuerineqareersoq isornartorsiuinnaqqunagu, aammalu aaqqiissutissanik pilersitsiviusunnaasunik saqqummiusseqqullugit Ane Hansen politikerillu allat kaammattussavakka, Martha Lund Olsen oqarpoq.
AAMMA ATUARUK Ilaasutut pisinnaatitaaffitit takukkit
