Disko Line iluarsiissuteqassalluni neriorsuisoq
Disko Line Kalaallit Nunaata kujataani, qeqqani Qeqertarsuullu Tunuani januaarip aallaqaataa aallarnerfigalugu sullissisalermalli umiarsuaateqarfik ilaasunit politikeriniillu isornartorsiorneqangaatsiarpoq.
- Piffissakilliorluta tamanna piareerniarsimavarput. Isumaqatigiissutillu kingulliit decembarip 30-ani 2016-imi atsiorneqarput, Disko Linemi piginnittoq Jørgen Nielsen oqarpoq.
AAMMA ATUARUK Takornariakinnerulernissaq ingerlatsisut aarlerigaat
AAMMA ATUARUK Ilaasutut pisinnaatitaaffitit takukkit
Malinnaasinnaanngitsut
Angalasut takornarianillu angallassisartut pitsaasumik kiffartuunneqaratik pakatsisut, piginnittup miserratiginngilaa.
- Sulisukinnikkut oqarasuaatikkut saaffiginnittunut malinnaasinnaanngilagut pingaartumillu angalanissamut pilersaarutit nikerartuartillugit malinnaasinnaanata. Tamanna aaqqiiviginialeruttorparput, Jørgen Nielsen oqarpoq, neriorsuutigalugulu Disko Linemi allaffimmiut siunissami pissarsiariuminarnerulerumaartut.
Umiarsuaateqarfiummi angallassinissamut pilersaarutai pingaarnertut massakkut ukkatarineqarput, tamatumani angallassinissamut suliassat aaqqissinnaaqqullugit, aammali umiarsuit qulimiguullillu naammattut angallassinissaat salliutikkitsik, piginnittoq oqarpoq.
AAMMA ATUARUK Ilaasutut pisinnaatitaaffitit takukkit
Nakkutilliisut amerlanerusut
- Oqarasuaatikkut saaffiginnittut sullissinnaaniarlugit amerlanerusunik nakkutilliisoqarnissarput sulissutigaarput. Saaffigineqarsinnaasumik aamma unnukkut nakkutilliisoqalissaaq angalanissamullu pilersaarutit nikerartuartillugit unnukkut saaffiginnittoqarsinnaalissaaq.
Disko Linemi piginnittup Jørgen Nielsenip erseqqissaatigaa oqarasuaatikkut nakkutilliivik pilersinneqartussaq paasissutissiiviussanngitsoq.