Danske Bank mittarfiliornissamut aningaasaliisussarsioqataassaaq

Kalaallit Airport A/S Ilulissani, Qaqortumi Nuummilu mittarfiliassat pillugit aningaasalersuinermut siunnersortissamik oktobarip ingerlanerani neqerooruteqartitsivoq.

Ilulissani, Qaqortumi Nuummilu mittarfissanut katillugit 3,6 milliardit koruunit missaannik aningaasalersuisoqarnissaa naatsorsuutigineqarpoq, 50 aamma 55 procentiisa akornanni Namminersorlutik Oqartussanit akiliutitut aningaasalersorneqarnissaat pissarsiarineqassallutik, sinnerilu nunani tamalaani taarsigassarsititsisartuni taarsigassanit aningaasalersorneqarnissaat naatsorsuutigineqarluni.

- Danske Bankip suliassarilerpaa Kalaallit Airports A/S-ip taarsigassarsititsisartunut paasissutissanik najoqqutassanik suliaqarneranik, kiisalu mittarfiliassanut Namminersorlutik Oqartussat tungaanniit nammineq aningaasaatinik akiliuteqarnikkut aningaasalersorneqartussaanngitsunut, nunani tamalaani taarsigassarsianik aningaasalersuisussarsiornissaanut, ikiuunnissaq, Kalaallit Airports A/S tusagassiuutinut taama nalunaaruteqarpoq.

AAMMA ATUARUK Nalinginnaasumik isumaqatigiinneq ajortut mittarfiit tulleriaarlugit sanaartorniaraat

Danske Bank suliassamut neqerooruteqartunut ilaavoq, suliassamullu soqutiginniluartoqarnera Kalaallit Airports A/S-ip pisortaanerata Steffen Ulrich-Lyngep nuannaarutigaa:

- Danske Bankip suleqatiginissaa qilaanaaraarput aammalu siunnersortigut peqatigalugit taarsigassarsinikkut aningaasalersuutissat pisariaqartut pissarsiarinissaasa iluatsinnissaa neriulluarfigalugu misigisimalluta, Steffen Ulrich-Lynge oqarpoq.

AAMMA ATUARUK Demokraatit Tunumi mittarfiliornissamut pilersaarutinik ujartuisut

Danske Bankip aappaagumut januaarumut pilersaarutaa pingaarneq naapertorlugu taarsigassarsititsisartunut uppernarsaatinik pisariaqartunik suliaqarnissamut, aningaasalernissamillu neriorsuutinik takussutissiisunik pissarnissamut piffissalerneqarpoq.

Mittarfinni sanaartornermik suliaqarnissamut neqeroortitsineq aappaagu 2018-imi upernaakkut aallartereersinnaassallugu Kalaallit Airports A/S-ip naatsorsuutigaa, mittarfimmilu suliaqarnerit aappaagu aasakkut aallartissinnaanissaat neriuutigineqarluni.

AAMMA ATUARUK Mittarfimmut aqqusinniornermut 103 millionit Sermersuup aningaasartuutiginiaraa