PITUFFIK Danmarkip Nunattalu piumasaqaateqarnissartik tunuarsimaarfigisariaqaraat
Pituffimmi kiffartuussinissamik isumaqatigiissut pillugu atorfilittatigoortumik suleqatigiissitat marluusut, Nunatta, Danmarkip USA-llu suleqatigiillutik pilersitaat ukioq ataasingajaq tusagarfigineqarsimanngillat.
Aamma piffissami tullernermi taamaakkallassasoq, danskit nunanut allanut tunngasunut ministeriat Kristian Jensen (V) ilisimatitsivoq.
Amerikamiummi sakkutuuisa timmisartortartut, danskit ingerlatseqatigiiffiisa aamma amerikamiut ingerlatseqatigiiffiata Exelis Services A/S-ip eqqartuussisutigut suliassanngortitaat USA-mi suli ingerlanneqartillugit, kiffartuussinissamik isumaqatigiissummut nutaamut piumasaqaatit qanoq ittuussanersut Naalagaaffeqatigiit pisortatigoortumik oqaaseqarfigisinnaanngilaat.
Tamatumunngalu minnerunngitsumik USA-mit kissaateqartoqarnera pissutaasoq, Kristian Jensenip oqaatigaa.
- Saqqummiussiaarpallaaraannimi, taakku eqqartuussisutigut suliani nutaani ilanngunneqaratarsinnaapput. Oqaaseqaatigineqartut eqqartuussivimmi suliamut sunniuteqarsinnaapput. Taamaammat eqqartuussissutigut inerniliisoqartinnagu Danmarkimut Kalaallit Nunaannullu isumaqatigiinniarnerit ingerlasut oqaaseqarfigineqannginnissaat USA-mit kissaatigineqartupilussuuvoq.
Aamma atuaruk Kristian Jensen: Greenland Contractors Pituffimmiiginnassaaq
IA: Nunarput Danmarkilu erseqqissumik nalunaaruteqartariaqarput
Folketingip Kalaallit Nunaannut tunngasunut ataatsimiititaliaani isumasioqatigiinnermi ullumi pingasunngornermi taama nassuiaasoqarpoq. Inuit Ataqatigiit (IA) aamma Enhedslisten isumasioqatigiinnissamut aggersaasuupput.
IA-meersoq Aaja Chemnitz Larsen isumaqarpoq taamatut suleriaaseqarnissaq kukkunerusoq. Pituffimmi kiffartuussinissamik isumaqatigiissut suliarimannittussarsiuuteqqinneqassagaluarpat tamatumunnga sunik piumasaqaateqartoqarnissaanik Nunarput Danmarkilu erseqqissumik nalunaaruteqartariaqarsorai.
- Tamanna Nunatta maanna inissisimaneranut naleqqiullugu pitsaanerpaassaaq, ingerlatseqatigiiffimmi danskinit-kalaallinit pigineqartoq siunissami toqqarneqassanersoq maanna nalorninartupilussuuvoq, KNR-imut taama oqarpoq.
Aamma atuaruk USA Pituffik pillugu eqqartuussissulersuinernut ilannguttoq
Suleqatigiissitat suliaat ilisimasaqarfiginerorusukkaat
Pituffimmili siunissami kiffartuusinissamik isumaqatigiissutaasussaq pillugu Kalaallit Nunaata, Danmarkip USA-llu akornanni isumaqatigiinniarnerit pitsaasumik qanittumillu ingerlanneqartut, danskit nunanut allanut tunngasunut ministeriata erseqqissaatigaa.
IA-p Enhedslistenillu isumasioqatigiinnermi tunngavilersuutigisaat tassaavoq Folketingip Kalaallit Nunaannut tunngasunut ataatsimiititaliaata isumaqatigiinniarnerit pillugit ilisimatinneqarnerusariaqartoq. Taamaaliortoqarsinnaasorlu Kristian Jensenip erseqqissarpaa, ataatsimiititaliarlu nunat akornanni isumaqatigiinniartoqarnerani allagaataasut atuarnissaannut periarfissikkusuppaa.
Christian Juhlilli Enhedslistenimeersup ataatsimiititaliap isumaqatigiinniarnerni qaninnerusumik peqataatinneqarnissaa kissaatiginerugaluarpaa.
- Imaassinnaavoq tusagassiortunik najuuttoqartillugu taamaaliortoqarsinnaanngitsoq. Aamma inimi matoqqasumi eqqartuisinnaavugut, suliallu ingerlanneqarnerani nipangersimasussaatitaalluta, KNR-imut taama oqarpoq.
Aamma atuaruk Greenland Contractorsit Pituffimmut nutaamik isumaqatigiissuteqarput
