Danmark killeqarfimmik nakkutilliigallarnissamik atuutilersitsisoq
Qimaasut nunasiniartullu Sverigemut ingerlaqqinniartut kinaassutsimik uppernarsaatinik Københavnip mittarfissuani unnuap-qeqqaniit takutitsisariaqalernerat matumani pissutaavoq.
Danmarkimit Sverigeliarniarnermut atatillugu ukiut 60-it kingulliit ingerlaneranni aatsaat uppernarsaateqartoqartariaqalerpoq.
- Nunat avannarliit allat nunamut isersinnaasunik killilersuiniarnerat Danmarkimut kinguneqarluarsinnaavoq. Qimaasutut qinnuteqarniartut amerlinerinik kinguneqarsinnaavoq, Lars Løkke Rasmussen tusagassiortunik katersortitsinermi oqarpoq.
AAMMA ATUARUK Sverigep Danmarkillu akornanni killeqarfimmik nakkutilliisoqalersoq
Killeqarfimmik nakkutilliineq aallaqqaammut ulluni qulini atuutsinneqassaaq.
- Killeqarfimmik nakkutilliigallartoqarnissaa pisariaqartinneqarpoq, qimaasorpassuit nunasiniartorpassuillu Danmarkimi unittuunnginnissaat anguneqassappat, ministeriuneq oqarpoq.
Qimaasut nunasiniartullu 160.000-it Sverigemut maannamut anngussimanerat pissutaallutik uppernarsaatinik takutitseqqaartalernissaat Sverigep aalajangerpaa.
Danmarkimi nunasiniartutut maannamut qinnuteqarsimasut Sverigemut nunasiniartunut naleqqiullugu ikittuinnaapput, tassami 18.000-it maannamut qinnuteqarsimammata.
