Sverigep Danmarkillu akornanni killeqarfimmik nakkutilliisoqalersoq
Danmarkimit Sverigeliarniarnermut atatillugu ukiut 60-it kingulliit ingerlaneranni aatsaat uppernarsaateqartoqartariaqalerpoq.
Naak uppernarsaatissaqartariaqarneq Danmarkimi assigiinngitsutigut qassiiliutigineqaraluartoq eqqissisimasumik isumagineqartoq, Danmarkimi qimuttuitsunik ingerlatsisut DSB-p tusagassiisartuisa pisortaata Tony Bispeskovip nalunaarutigaa.
- Inuit uppernarsaataat misissortarpavut, inuillu siuleriiaartut amerlagisassaanngillat unammillernartoqanngilarlu, Tony Bispeskov, nutaarsiassaqartitsivimmut Ritzauimut oqarpoq.
Danmarkip Sverigellu akornanni killeqarfimmi nakkutilliisoqarnissaanut suliakkinneqarsimasoq tassaavoq Securitas. Qimaasut nunasiniartullu uppernarsaataat smartphonesit atorlugit assilisassavaat nalunaarsorlugillu.
Inuup ataatsip uppernarsaataasa nalunaarsorneqarnerat 15-it 20 sekundillu akornanni sivisussuseqartarpoq, inuillu qassit maannamut nalunaarsorneqarsimanersut DSB-p tusagassiisartuisa pisortaata oqaatigaa, qassillu ingerlaqqissinnaanngitsutut nalilerneqarsimanersut aamma oqaatigisinnaannginnerarlugu.
Qimaasut nunasiniartullu 160.000-it Sverigemut maannamut anngussimanerat pissutaallutik uppernarsaatinik takutitseqqaartalernissaat Sverigep aalajangerpaa.
Danmarkimi nunasiniartutut maannamut qinnuteqarsimasut Sverigemut nunasiniartunut naleqqiullugu ikittuinnaapput, tassami 18.000-it maannamut qinnuteqarsimammata.
