Danmark assammik arsaannermi pingajussaanik VM-imi pissartanngortoq
Danskit angutitaasa assammik arsarlutik nunanut allanut unammisartui, nunat tamat assammik arsartuini oqaluttuarisaanermut ilannguput, nunarsuaq tamakkerlugu assammik arsarluni pissartanngorniutivinnermi Frankrigemut ippassaq sapaammi unnukkut unammigamik 34-nik isertitaqarlutik ajugaagamik franskit 29-nik isertitaqarlutik sølvinnakamik.
Nunarsuaq tamakkerlugu assammik arsarluni pissartanngorniuttarnerni tulleriinni pingasuni Danmark siullersaalluni pissartanngorpoq guldinnalluni.
Sungiussisimalluinnartunik nukissaqarluartunik inuusuttunillu piginnaasaqaarluartunik arsartartoqatigiinnera pissutaalluni danskit assammik arsartartui suli ajugaasarallassaput.
Unamminerup immikkoortuata siulliani danskit arsartartui aqqaneq-marlunnik isertitaqarlutik siuaqqapput franskit arfineq-marlunnik isertitaqartut, unamminerullu immikkoortuata siulliup naajartulernerani danskit franskillu isertitaminnik naligiingajalluinnarput unikkallarnermi danskit 16-nik iseritaqaramik franskit 15-inik isertitaqartut.
Danskit 32-nik iseritaqartut franskillu 29-nik isertitaqarneranni, unamminnerullu naammassinissaanut minutsit marluinnanngortut franskit strafferlutik iserteriagaat marluk Landinip annaappai, taamaalillutillu franskit ajugaanissaminnut neriuutarullutik.
Danskit angutitaasa assammik arsartartui Københavnip Rådhusiani nunatsinni nalunaaqutaq ataatsip qaangilaarnerani akunnerni marlunni nalliuttorsiutigineqassapput oqalugiartoqarluni pannakaatuuttoqarluni, arsartartullu rådhusip aneersuartarfiani balkonimiissallutik.
