Canadami naggueqatigiit Inuit assigiimmik allattaaseqalerusuttut
Canadami naggueqatigiit Inuit assigiinnerusumik allattaaseqarnissaat naggueqatigiit Inuit suliniaqatigiiffiata Inuit Tapiriit Kanatamip qaammatialunnguit matuma siornatigut suliniutigilerpaa, naqinnerit assersuutigalugu Nunatsinni ullumi atorneqartut assinginik allattaaseqaqqulerlugit.
Naqinnerit Canadami tamanut atuuttussat, oqaatsit pillugit Inuit Tapiriit Kanatami ataatsimiititaliap sapaatip-akunnerata siuliani ataatsimiinnermini aalajangerpaa, suliniaqatigiiffillu Ottawami sapaatip-akunnerata tulliani ataatsimeeqqissaaq, oqaatsit pillugit ataatsimiittoqaqqissalluni.
- Ataatsimut isigalugu tamatta immitsinnut paasisinnaavugut, paasinninnerilli aamma killeqarput, suliniaqatigiiffiup præsidentia Natan Obed atuagassiamut Maclean's Magazinemut oqarpoq.
Aamma atuaruk Canadami naggueqatigiit Inuit assigiimmik allattaaseqaleratarsinnaasut
Inuktitut sumiorpalussutsit assigiinngitsorujussuupput, inuiaqatigiit avinngarusimanerusuni najugallit oqaasii ilaatigut allaanerusarlutik, allattaasiallumi aamma assigiinngittaqalutik.
Tamanna pissutaalluni Canadami naggueqatigiit Inuit akornanni attaveqaqatigiittarneq ilaatigut ajornakusoorsinnaasarpoq.
Oqaatsilli assigiiaarnerulersinneqarpata, naqinnerillu tamanut atuuttussat atuleraanni pitsaanerusumik attaveqaqatigiittoqalersinnaassagaluartoq Natan Obedip oqaatigaa, assersuutigalugu oqaatsit ilinniartitaanermi atorneqartussat pilersinneqarsinnaalissallutik, Obed oqarpoq.
Inuit Tapiriit Kanatamip oqaatsit pillugit ataatsimiititaliaata Canadami naggueqatigiit Inuit oqaasii pillugit innersuutissai upernaaru saqqummiunneqarnissaat naatsorsuutigineqarpoq.