Camp Centurymi saliisoqarnissaa IA-p piumasariniarpaa

Misissuinermi nutaami silap kianneruleriartorneranik Camp Centuryp mingutsitsinerata avatangiisinut navianartorsiortitsilersinnaanera pillugu saqqummersumut, IA taama qisuariarput.

Aamma atuaruk Ilisimatuut: Camp Century avatangiisinut ulorianarsinnaavoq

- Uku paasissutissat nutaat soorunami tupaallannarput. Paasissutissallu nutaat tunngavigalugit takussutisserneqarpoq mingutsitsinissaq pinngitsoorneqarsinnaanngitsoq, massakkut naatsorsuutigisamit siusinnerusukkut pisussatut nalunaarsorneqarsimasoq, Inuit Ataqatigiit siulittaasuat Sara Olsvig oqarpoq. 

Igitassat kuugussaassapput

Ilisimatuut naapertorlugit dieselimik 200.000 literinik aamma mingulimmik 24 millionit literinik imeqarpoq, avatangiisinut navianarluinnartumik PCB-mik akulimmik qalipaateqarlunilu radiuaktiviusunik igitassaqarpoq.

Amerikamiullu Camp Century qimakkamikku igitassat assaassatik qaqugorsuarmut saqqummertussaajunnaarsimanngilaat, silallu kianneruleriartorneranik eqqakkat imaanut sermillu qanittuanut kuugussaassapput.

Aamma atuaruk Danskit ministeriat atomip nukinganut tunngasunut apeqqut googlerlugu akissuteqarsimanerarpaa

IA-p taamaammat paragraf 37 atorlugu Naalakkersuisut apeqquteqarfigaat.

- Massakkullu nunatsinniit uani erseqqissuliornissaq piumasaraarput tassungalu ilaassaaq saliisoqarnissaanik piumasaqarnissaq tamannalu pisariaqartutut isigaarput, IA-p siulittaasua oqarpoq.

Saliisoqarnissaa nunatsinnit piumasaqaatigineqassaaq

Saliinissamut Danmark USA-luunniit akisussaassanersoq ilisimatuut nalornissutigaat.

Tamannalu paaserusullugu IA-p Folketingimut ilaasortaatitaa Aaja Chemnitz Larsenip danskit Naalakkersuisuinut apeqqutiginiarpaa.

Mingutsitsinermi qimaannarneqassanngitsoq Nunatta piumasaqaatigisariqaraa, IA isumaqarpoq.

- Tunngavigiuassavarput aamma uterfigiuassavarput nunatsinnit piumasaqaat annerpaaq tassaassasoq saliisoqarnissaa.