Borgmesteriusimasoq inatsisartunilu ilaasortaasimasoq inuarsimasutut pineqaatissinneqartoq

Angut utoqqaq Tasiilami arnamik aallaallugu inuartarinnissimasutut ukioq manna tallimanngornermi januaarip 13-iani tigusarineqarpoq. Eqqartuussullu Eqqartuussisoqarfik Sermersuumi septembarimi nalunaarutigineqarpoq: Angut pineqartoq ukiuni arfinilinni pineqaatissinneqarsimasunut inissiisarfimmiittussanngortinneqarpoq.

Kingorna paasinarsivoq angut utoqqaq pineqartoq tassaasoq Ammassalimmi borgmesteriusimasoq Inatsisartunilu ilaasortaasimasoq, Jakob Sivertsen. Tusarfiit arlallit KNR-imut tamanna uppernarsarpaat.

Arnaq, nuliami ilaqutaa, tallimanngornermi januaarip 13-iani ualikkut aallaasimallugu eqqartuussivimmi nassuerutigaa. KNR-ip eqqartuussiviup allagaataanik takunnikkumallugu noqqaassuteqarnerata kingorna tamanna paasinarsivoq.

Utertoq

Jakob Sivertsen eqqartuussivimmi oqaluttuarpoq arnaq pineqartoq ullormi tassani siusinnerusukkut pulaarsimasoq, aammalu akulikitsumik pulaartartoq. Nalunaaqutaq tallimat missaani, taarsereersoq, uterpoq igalaarlu aserorpaa matulu tukkarlugu. 

Arnap savik nerrivimmiittoq isigilerpaa, taamaammat erngertumik qimagutinngippat aallaaniarlugu arnaq sioorasaarpaa. Taamaaliunngimmallu arnaq igalaap silataaniittoq illup iluanit aallaasimallugu oqaatigaa.

Eqqartuussivimmi aamma nassuiaavoq taliatigut aallaniarsimagaluarlugu, quaakkamili arnaq sakiaatigut eqqortoorpaa taannalu uppippoq. Oqaatigaa imminut nulianilu pitsorluttoq illersorumallutik aallaasimallugu.

Politiilli sianerfiginiarlugit oqarasuaammukarsinnaasimanngilaq, nassuerutigaali igalaap aserorneqannginnerani inimut allamut aallaammik aallersinnaasimalluni.

Igalaaq aseroraa

Toqutsinermik suliap Eqqartuussisoqarfik Sermersuumi ingerlanerani arnap qanoq-innera takunnittunit arlalinnit oqaaseqarfigineqarpoq. Takunnittut ilaat, angut, oqaluttuarpoq arnaq illumut takkussimasoq oqarasuaatinilu angallattagaq tigujumallugu oqalulluni, assanilu tamaasa atorlugit matukkut igalaakkullu kasuttorsimavoq, igalaarlu aserorpaa. Arnarli sioorasaarisutut pissusilersorpasinnginnerarpaa.

Tusaasimavaalu Sivertsen arnamut oqartoq qimagutinngippat aallaaniarlugu. Oqarasuaatinili tigujumallugu tamanna unissutiginngilaa.

Takunnittup politiit attaveqarfigai, Jakob Sivertsenilli arnaq aallaammik kaliber 243-mik aallaammagu politiit suli takkutinngillat.

Taamaammat politiit sianerfigeqqippai ambulancemillu ornigutsitseqqullugit, ambulancelu minutsit 15-20-t qaangiummata takkuppoq.

Takkutinnginneranilu takunnittup arnaq aallaatittoq oqaloqatigaa. Apersorniarsarigaluarpaa, qanorli oqalunnersoq paasisinnaasimanagu. Taama pisoqarnerani Jakob Sivertsen nipaalluni illup matuata killingani nikorfavoq.

Nuliata soralussani nunami nalasoq takugaa

Jakob Sivertsenip nulia eqqartuussivimmi oqaluttuarpoq susoqarnera paasisimanagu. Seqqorpallammik tusaavoq, taava pania iserpoq anaanani aallugu.

Soralussani illup silataani nunami nalasoq takuaa oqaluunniarsaralugulu.  'Suit?' aperivoq, paniatalu oqarfigaa soraluaa toqusimasoq.

Sivertsenip nulia naapertorlugu soralussani ajornartorsiutigisimanngilaat. Ikiuukkumatuujuvoq aammalu soralussaminit ajortumik tusanngisaannarsimavoq.

Pania kingusinaartoq

Jakob Sivertsenip pania takunnittutut eqqartuussivimmi aamma nassuiaatinneqarpoq. Ataataata sianerfigisimavaa oqarluni igalaaq aserorneqarsimasoq, taamaammat angajoqqaami illuannukarpoq.

AAMMA ATUARUK Tasiilami alianartumik pisoqarnerata kingorna ikumatitalerluni ingerlaaqatigiittoqarpoq

Taakunnarnermini seqqorpallammik tusaavoq, apuukkamilu arnaq nunami nalasoq takuaa. 'Aallaavaanga, aallaavaanga', arnaq nunami nalasoq oqarpoq. Tamatuma peqatigisaanik Jakob Sivertsen igalaap eqqaaniippoq paatsiveeruteqqalluni. Panini oqarfigaa taliatigut aallaaniarsimagaluarlugu. Kukkulluni sakiaatigut aallaasoorsimagaa, paniusup ataatani issuarlugu oqarpoq. 

Inuarsimasutut pineqaatissinneqartoq

Jakob Sivertsen ukiuni arfinilinni pineqaatissinneqarsimasunut inissiisarfimmiittussanngorlugu eqqartuussivimmit septembarip 21-ani pineqaatissinneqarpoq.

Jakob Sivertsen eqqartuussivimmi nassuiaavoq imminut nulianilu illersorumallugu allatut ajornartumik aallaannittariaqarsimalluni. Taamatulli nassuiaateqarnera eqqartuussiviup akuerinngilaa. Eqqartuussiviup allattuiviani atuarneqarsinnaavoq arnap inuartarineqartup kamassimannginnerata takunnittunit arlalinnit oqaluttuarineqarnera eqqartuussivimmit tunngavigineqartoq.

AAMMA ATUARUK Kriseberedskab i Tasiilaq får ekstra hjælp fra Nuuk

Tamatuma saniatigut eqqartuussivik aamma allappoq piffissaq aallaammik inimut allamut aallerfigisani politiit attaveqarfiginissaannut atorsimasinnaagaluaraa. Aamma aallanninnginnermini panini sianerfigisinnaasimavaa igalaamillu aseruisoqartoq oqaluttuaralugu.

Jakob Sivertsen aamma ilisimasariaqaraluarpaa arnaq taliatigut aallaaguniuk toqusinnaasoq, aallaammi kaliber 243 atorpaa, taannalu nannunniarnermini piniakkanillu anginerusunik piniarnermini nalinginnaasumik atortarpaa.

Tasiilami aliasunneq

Suliaq Tasiilami januaarip qaammataani ilungersunartorsiortitseqataasoq taamaalilluni naammassineqarallarpoq. Taamani inuartarinninnerup peqatigisaanik illoqarfimmi innuttaasut marluk aamma imminnut toqupput. Kommuneqarfik Sermersooq upalungaarsimasuutitanik Tasiilaliartitsivoq borgmesterilu Asii Chemnitz Narup aamma illoqarfimmi innuttaasut oqaloqatigiartorlugit tikippoq.

Jakob Sivertsenip pineqaatissinneqarnini Nunatta Eqqartuussivianut suliareqqitassanngortissimagaa Kalaallit Nunaata Politiivini unnerluussisussaatitaasut ilisimatitsipput. Tamannnali suli ullulerneqanngilaq.

Siornatigut uissuumminartulioreersoq

Jakob Sivertsen nunatsinni aviisit saqqaasigut aatsaat sammineqalinngilaq.

Inatsisartunut qinigassanngortinnissaa Atassummit 2005-imi itigartitsissutigineqarpoq. Attaviitsutullu taamani qinigassanngortippoq.

AAMMA ATUARUK Tasiilami angut toqutsisimasutut pasineqarpoq

Kangerlussuarmi pisoq pissutigalugu Atassut taama aalajangerpoq. Sivertsenip aalakoorluni Air Greenlandimi sulisut assortorsimavai timmisartumut Kulusummukartussamut ikeqqunngimmanni. Kingorna tigusaavoq isertitsivimmullu inissinneqarluni, tamannalu partiimit akuersaarumaneqanngilaq. Jakob Sivertsen qinersinermi taamani 66-init qinerneqarpoq. 

Allaaserisami paasissutissat Eqqartuussisoqarfik Sermersuumi eqqartuussiviup allattuiviinit, KNR.gl-imi aviisinilu Sermitsiami AG-milu allaaserisanit kiisalu unnerluussisussaatitaasut paasissutissaataannit pissarsiarineqarput.