Upalungaarsimasuutitat Tasiilamut ikiuukkiartortut
Kommuneqarfik Sermersuumi borgmesteri aamma Isumaginninnermut, Suliffeqarnermut Inuussutissarsiornermullu pisortaq, tarnip nakorsaa aamma tarnip pissussaanik ilisimasalik isumaginninnermullu siunnersorti Tasiilami kommunimi sulisunik tapersersuiartorlutik Nuummit ippassaq ullup qeqqanut aallarput.
AAMMA ATUARUK Borgmesterip upalungaarsimasuutitat Tasiilaliaqatiginiarai
Sapaatit-akunnerata ataatsip ingerlanerani alianartut pingasut nalaanneqarput.
- Pisut immikkut illuinnartuupput, pisut alianartorujussuit tulleriiginnaat pingasut nalaanneqarput, Kommuneqarfik Sermersuumi isumaginninnermut immikkoortortaqarfimmi pisortaq Grethe Nielsen taama oqarpoq. Borgmesteri Asii Chemnitz Narup aamma Grethe Nielsen Tasiilaliarput, kommunimi isumaginninnermut immikkoortortaqarfimmi sulisut tapersoriartorlugit.
- Pisut alianarluinnartut sapaatit-akunnerata kingulliup ingerlanerani nalaanneqarput, Tasiilami upalungaarsimasuutitaqarpugut ajunngivissunik, kisianni avataanit ikiorneqarnissaminnik pisariaqartitsipput, tamannalu pissutigalugu aallarpugut, Grethe Nielsen oqarpoq.
AAMMA ATUARUK Tasiilami angut toqutsisimasutut pasineqarpoq
Arnaq 40-nik ukiulik januaarip ulluisa arfineq-aappaanni imminut toquppoq, arnarlu alla 21-nik ukiulik ullut pingasut qaangiummata aamma imminut toquppoq. Tamatuma kingorna ullut pingasut aamma qaangiummata, Tasiilami alianartumik pisoqaqqippoq, arnaq 39-nik ukiulik tallimanngornermi januaarip ulluisa 13-ianni toqutaavoq.
Tasiilami kommunimi sulisut tapersersoriartoraat
- Tasiilami upalungaarsimasuutitat tapersersorneqarnissaat pineqarpoq, taamaattumik uanga borgmesterilu sulisugut, pingaartumik isumaginninnermik suliaqartut, ulluni tulliuttuni tapersersussavagut.
Ilaqutaasut qanigisaasullu ikiorneqartariaqartut
Immikkut ilisimasalinnit ikiorneqartariaqartut kikkuunneri Tasiilami kommunimi sulisunit maanna misissorneqarpoq.
Tasiilami immikkoortortaqarfiup maanna misissorpaa, kikkut ajornartorsiorlutik ikiorneqarnissaminnik pisariaqartitsinersut, inuit ataasiakkaat imaluunniit inuit arlaqartut ataatsikkut ikiorneqartariaqarnersut taakkualu pissarsiariniarneqassapput, Kommuneqarfik Sermersuumi isumaginninnermut pisortaq Grethe Nielsen taama oqarpoq.
Ilaqutaasut qanigisaasullu saniatigut kommunimi sulisut ikiorneqarnissaminnik pisariaqartitsisut aamma ikiorneqassasut, Grethe Nielsenip oqaatigaa.
Kommuneqarfik Sermersuumi isumaginninnermut pisortaq Grethe Nielsen aamma borgmesteri Asii Chemnitz Narup pingasunngorpat Nuummut utissapput, Nuummili upalungaarsimasuutitat arfininngornerup tungaanut Tasiilami sulissallutik.
