Birna pillugu suliaq: Biilini tilluarneqarsimasoq
Birna Brjánsdóttirip tammarneranit timaa islandimiut politiivinit ullut arfineq pingasut qaangiummata nassaarineqarpoq.
Misissueqqissaarnermilu arnap DNA-mik ilisarnaatai unnerluutigineqartup biilini attartorsimasaani nassaarineqarput.
Toqusunik misissuisartoq, Urs Wiesbrock, biilini persuttaasoqarsimanera qanorlu tamanna pisimaneranik eqqartuussinermi uppernarsaasutut nassuiaatinneqarpoq.
AAMMA ATUARUK Iperagaasimasoq persuttaanerup nalaani biiliniissimasinnaanngilaq
AAMMA ATUARUK Unnerluutigisap isiginnittullu nassuiaataat assigiinngitsut
Toqusunik misissuisartup arnap toqungasup timaani ajoqusersimanerit assit atorlugit eqqartuussivimmi saqqummiuppai. Arnarlu kiinnamigut ajoqusingaatsiarsimavoq, qingaa napisimavoq qiminneqarsimallunilu, vísir.is allappoq.
Wiesbrock naapertorlugu arnaq nukersornikkut persuttarneqarsimavoq. Sakkulersortoqarsimanngilarli, sakkulersortoqarsimagaluarpammi ersarinnerusumik takussutissaqarsimassagaluartoq, toqusunik misissuisartup nassuiaatigaa.
Arnaq ilaasut issiavianni aqorlermi tilluarneqarsimavoq, biilillu qilaa talerperleq aagasammat assammik saamimmik tilluarneqarsimassasoq, Wiesbrock oqarpoq.
- Talerperleq atorneqarsimasinnaanngilaq, tassami iigarfik akornutaasussaammat. Assak talerperleq tassunga sangutinneqarsinnaanngilaq, toqusunik misissuisartoq, Urs Wiesbrock, nassuiaavoq.
Takussutissat peerniarneqarsimagaluartut
Taassuma saniatigut misissueqqissaartartut aammik akoorutissaq, Luminolimik taaneqartartoq, atorlugu biilini ujaasisimapput. Akoorutissaq taanna aammik akuneqaraangami qaammartarpoq. Taamaasioramillu biilip aquani matu talerperleq tamangajaat qaammarsimavoq.
Taamaammat toqusunik misissuisartoq immikkullu ilisimasallit inerniliipput aak biilinit peerniarneqarsimagaluartoq.
Birna Brjánsdóttir pillugu eqqartuussineq tallimanngornermi septembarip aallaqqaataani nanginneqassaaq.
