AWG-mut aqutsisut sinneqartoornermut iluarisimaarinnittut
Arctic Winter Games 2016 8,6 millionit koruuninik sinneqartoorfiuvoq. Aningaasartuutissatut naatsorsuutigineqaraluartut atunngitsoorneri, inuussutissarsiortullu tapersersuilluarnerat ilaatigut pissutaasut, AWG2016-imi pisortaq Maliina Abelsen oqarpoq.
- Inuussutissarsiortut tapersersuilluarnerat sinneqartoornermut ilaatigut pissutaavoq. Aamma aningaasaqarnermut nakkutiginnilluinnaqqissaarnerput, ilimanginngisanillu aningaasaajaatissanut immikkoortitatta atortariaqarsimannginneri sinneqartoornermut pissutaapput, Maliina Abelsen oqarpoq.
Aamma atuaruk Issittormiut unammiuaarnerat 2016 aningaasatigut sinneqartoorfiulluartoq
Ishockeyrtartut silarlunnera pissutigalugu Nuummukanngitsoornerat, dommerillu ilaasa timmisartornerannut akiliisariaqannginneq aningaasanik sipaarfiusorujussuusimapput.
- Silarluttussaanera dommerillu timmisartoqataasinnaanersut taamani naluarput. Taamaammat aningaasat nakkutigeqqinnaarpagut. Ataatsimilli qularisaqanngilagut: aningaasat naammannginnerannik oqarfigisaqarusussimanngilluinnarpugut, Maliina Abelsen oqarpoq.
Aamma atuaruk Ishockertartut timmisartornerminni AWG-ip aningaasaqarnera misilerassavaat
Aningaasat sinneqartoorutigineqartut nammineq kajumissutsimik suliaqartitsinermut, inuusuttunut, timersornermut kulturimullu atorneqarnissaat, Maliina Abelsenip neriuutigaa. Piginnittulli Host Cityp aningaasat qanoq atorneqarnissaat aalajangissavaa.