Issittormiut unammiuaarnerat 2016 aningaasatigut sinneqartoorfiulluartoq
Issittormiut unammiuaarnerannit AWG2016-imi aningaasarpassuit sinnerussimasut aaqqissuisut nalunaaruteqarput.
Unammiuaarnernit naatsorsuutit naammasseqqammivaat ungasinngitsukkullu matuvinneqassaaq, tamanna pissaaq aningaasanik sinneqartoorfiulluartumik.
Suliniummut naatsorsuutit naammassineqareernerini naatsorsuutit 8,6 koruuninik sinneqartooruteqarfiullutik angusaqarfiupput, tamannalu suliniummik aaqqissuisunit assut naammagisimaaneqarpoq.
- Angusat AWG2016-ip allatseqarfianit sukangasumik pitsaasumillu aqutsinermik, minnerunngitsumillu illoqarfimmi innuttaasunit annertuumik tapersersorneqarnermik ersersitsisut, AWG-ip aqutsisoqatigiivini siulittaasoq Christian Kjeldsen oqarpoq.
Sinneqartoorutittaaq aamma naatsorsuutiginngisamik aningaasartuutissat ilaasa atorneqannginnerannik pissuteqarpoq.
Aningaasat sinneruttut maanna piginnittaannut utertinneqassapput, taakkulu aalajangissavaat qanoq atorneqassanersut.
- Ilimanarporli suliassaqarfinnut AWG2016-imut uiggiutinut tapiissutigineqassasut, Christian Kjeldsen oqarpoq.
Allattoqarfik suliniullu pisortamit Maliina Abelsenimit septembarip 15-ianni matuneqassaaq, soorluttaaq Aqutsisoqatigiit atorunnaarsinneqassasut.
AWG2016-imi unammiuaarnerit iluatsilluareernerisa kingorna qujalluni inuulluaqqusisinnaaneq nuannersumik misinnarpoq. Suliniummut tapersersuineq annertooq misigalugu nuannerluinnarpoq, Maliina Abelsen oqarpoq.