Arnat assammik nunanut allanut unammisartuisa sungiusaasui erngertumik taamaatittut

Arnat assammik arsarnermi nunanut allanut unammisartui nutaanik sungiusaasortaassapput. Tassami nunanut allanut unammisartut sungiusaasuat, Anders Friis aamma sungiusaasutut ikiorti Kim Ostermann Petersen erngertumik atuutilersumik taamaatipput.

Allattoq Sebastian Trosborg

marsip 26-at 2024 13:32

Arnat assammik arsarnermi sungiusaasuat, Anders Friis aamma sungiusaasutut ikiortaa Kim Ostermann Petersen erngertumik atuutilersumik taamaatipput.

Timersoqatigiit Assammik Arsartartut Kattuffiat tusagassiuutinut nalunaarummi allappoq.

Qaffasinnerpaamik timersornermi tapersorteqannginneq pissutaavoq. Taamaammat allannguisoqartariaqarpoq.

- Tamanna angorusunnanngeqaaq, aningaasaqarnerli innarlernagu ineriartortitsinissaq qulakkeerniarlugu pisariaqavissimavoq, assammik arsartartut kattuffiat tusagassiuutinut nalunaarummi allappoq.

Aamma atuaruk VM: VM: Angajoqqaat tulluusimaangaatsiartut aqqutaa tamaat malinnaasut

Siulersuisut pisoq pillugu nalilersuisimapput, naallu sungiusaasut qulaani pineqartut sulinerminni angusarissaarsimagaluartut taamatut alloriartoqarnissaa aalajangerneqarpoq.

- Anders Kimilu atugassarititaasut imaluunniimmi amigaataasut atorlugit, angusaqarluarput.

- Piffissat annertungaatsiartut atorlugit arnat nunanut allanut unammisartut ineriartortippaat. Taakkununnga qujassutissaqaqaagut, tusagassiuutinut nalunaarummi allassimavoq.

Arnat Stavangerimi nunanut allanut ukiut 20-ni aatsaat siullermeertumik unammipput, normu 32-nngorlutillu.

Siunissamut takorluugaqangaatsiartut

Assammik arsartartut kattuffiat arnat angutillu VM-imut anngunniunnissamut suli annertuumik pilersaaruteqarusuppoq. VM-imi unamminermi unammisassat naliginerulernissaat angorusunneqarpoq.

Taamaammat kattuffiup nunanut allanut unammisartunut sinaakkutit pitsanngorsarniarpai, taamaalillutillu VM-imut anngunniunnissamut sapinngisamik piareersimalluarnerussallutik.

- Taamaakkaluartoq kajumissutsimik aqutsisoqarneq ataasiinnarmillu sulisoqarneq aallaavigalugu immitsinnut paarisariaqarpugut tulluartumillu alloriarluta. Tamanna uani angusoraarput, neriuutigiinnarparput politikkikkut aammaarlutik pimoorullugu timersortunut sinaakkutissat nukittorsarneqarumaartut, kattuffik tusagassiuutinut nalunaarummi allappoq.

Arnat nunanut allanut unammisartuini kikkiartuaartoqarnissaa maanna sulissutigineqartoq kattuffik aamma allappoq. Victoria Budek Svendsen U18-it nunanut allanut unammeqataariarluni tamanna pissaaq.