Arctic Sounds Festivalimi ukioq manna aatsaat taama pisoqartigissasoq
Sisimiuni poorskimi Arctic Sound Festivalertoqassaaq, taannalu qulissaanik ukioq manna aaqqissuunneqassammat tassani tusaamasarpassuaqarlunilu aatsaat taama pisoqartigissaaq.
Arctic Sound Festivalimik aaqqissuisut tusagassiorfinnut taama nalunaarput.
Tamatumunngalu atatillugu meeqqat 125-t Norgemeersut, nunatsinneersut Islandimeersullu sapaatit akunnerani matumani aamma Sisimiuniileruttorput. Nordic Arts, Music and Performance Youth Festivalimimmi taallugu workshoppernertalimmik, pikkorissarnertalimmik, pinngorartitseqatigiinnertalimmik, isumasioqatigiinnertalimmik tusarnaartitsinertalimmik immikkut aaqqissuussamik aamma festivalerput.
- Siunissamut ungasinnerusumut pilersaarusiortuaannarpugut, taamaammat pikkorissunik nipilersortoqarluta nuannivissumik festivalertuaannarumalluta meeqqat inuusuttullu nuannersunik misigisaqalereernissaat misilittagarsulereernissaallu salliutittariaqarparput, festivalimik aaqqissueqataasoq Laura Lennert Jensen oqarpoq.
Ulluni tallimani qimussissasut
Inuusuttunik festivalertitsinerup saniatigut nipilersortartut sisamat Arctic Sounds Festivalimi tusarnaartitsisussanut ilaasuusut ulluni tallimani qimusserput. Taakkua Kangerlussuarmiit UNESCO-p nunarsuarmi kingornussassatut allattugaataaniittoq, tassa Aasivissuit-Nipisakkoorlutik Sisimiunut qimussernerminni silap pissusiata allanngoriartorneranut tunngasumik nipilersuusiorput.
Taakkua tassaasut kalaaleqaterput Hans Ole Amossen, Savalimmiormiu Teitur, Sverigimiu Danmarkimi najugalik Lucky Lo aamma tuluk OneDa, qimussernerminni misigisatik aallaavigalugit nipilersuusiornissaat siunniussaavoq. Nipilersuusiaat Arctic Sounds Festivalimi sisamanngornermi ammaanersiornermi aallarniutaassaaq.
- Sisimiut eqqaanni pinngortitaq nunarsuarmi alianaannerpaammat allaallu nunarsuarmi kingornussassatut allattugaatiniimmat iluatsitseqqavugut, taassumalu allanut aamma takutinnissaa pingaartuusoraarput.
- Aammali qajannarlunilu qanoq issusia allanngoriartorpoq, suliniullu taanna silap pissusiata allanngoriartorneranik eqqumiitsuliornikkut nipilersortartunillu suleqateqarnikkut ukkataqarnermik suliniutitta arlaliusut ilaminiinnaraat 160 kilometeritullu isorartutigisumi qumussertut nipilersuusiaata tusarnissaa aamma qilanaaraarput, Laura Lennert Jensen oqarpoq.
Qimussernerminni nipilersuusiortut saniatigut nipilersortartut allat 16-it festivalertoqarnerani aamma tusarnaartitsissapput.
