MÛK Arctic Sounds pillugu: Peqataalluni nuannersorujussuuvoq
Sisimiuni Arctic Sounds festival ullunik tallimanik sivisussuseqartoq ataasinngormat naammassivoq.
- Nuannersuuaartumik ingerlavoq, taavalu meeqqanut ingerlatagut orninneqarluarput, aamma aaqqissuussat allat orninneqarluarlutik nuannarineqarluarput, festivalimik aaqqissueqataasoq Laura Lennert Jensen, oqarpoq.
- Malunnarpoq aamma Nunavukkormiut appisimaaraangata orninneqarluartartut aamma nuannarineqarluartut, kisianni soorunami aamma MŪK’kikkut orninneqarluarput aamma nuannersumik appisimaarput, AndaChan, Sigu’kkut, Nadia Theran aamma ingasassuaarpoq, taanna oqarpoq.
MÛK-ikkut guitarertuat, Pakkutaq Svendsen aamma nuannisarluarsimavoq.
- Nuanneq, ilimagisanniik inoqarneruvoq. Aamma nipilersortut amerlasuut nipilersoriaatsit assigiinngitsut tassani peqataaffigalugit nuannersorujussuuvoq
Tusarnaartitsinerit amerlanerit Aatsitassalerinermik Ilinniarfimmi sceneni marlunni ingerlanneqarput. Tusarnaariat inersuup illuaniit illuanut nuulaaginnartarlutik, tusarnaariaqattaartullu ilagaat Edvard Schmidt.
- Nuannertarnermik, aamma nipilersornerup silarsuaani soqutigisaqartuulluni allatut nipilersoriaasillit, kalaallinit allaanerulaartumik nipilersoriaasillit soqutiginartarnermik, taanna oqarpoq.
Qilaatersorneq, nipilersoriaatsit nutaaliat aammalu rockit allarpassuillu assigiinngiaartut tusarnaartitsissutigineqarput. Ilaatigut Japanimit Yogetso Skatsaka tusarnaagassani allaanersuni ilaapput.
Nunavummit James Ungalaq aamma tusarnaartitseqataavoq. Taassuma nipilersoqatiivi Northern Haze ilisimaneqarluarpoq, taassumalu Sisimiuni tusarnaartitsinini nuannaarutigaa.
- Massakkullu iliuuseqaqataavunga manna peqataaffigigakku, tamanna tarnikkut, uummatikkut, isumakkullu tulluusimaarutigeqaara, taanna oqarpoq.
Aaqqissueqataasup, Laura Lennert Jensenip oqarnera naapertorlugu isissutissat 300-nit 400-nut tunineqarput, Arctic Soundsilu qulingiluassaanik aaqqissuunneqarluni.
Nipilersortartut erinarsortartullu 80-it missaanniittut appipput, taakkunanngalu qulit Sisimiuninngaanneersuupput.
