VIDEO Aningaasanut inatsit 2015-imoortoq akuerineqarpoq
Qasigiannguani, Qaanaami Illoqqoortoormiunilu nakorsatut atorfiit peerneqassanngillat. Taamaakkaluartoq peqqinnissamut naalakkersuisoqarfiup allaffeqarfiani atorfiit arfineq marluk atorunnaarsinneqarniarput.
Aamma KNR aappaagumiit ussassaarisinnaajunnaassaaq, Piareersarfiit ukioq manna 8 millionit koruuninik aningaasaliiffigineqassaaq.
Great Greenlandilu ataatsikkut tigusassanik 15 millionit koruuninik tunineqassaaq.
Aamma atuaruk Aningaasanut inatsit 2015 Anda Uldum: Ataatsimoorluta qajaq makitissavarput
Taama pisoqarpoq Inuit Ataqatigiit Partii Nalerarlu aningaasanut inatsisissamut siunnersuut akueriniarnagu siornatigut oqaaseqareeraluartut.
Inuit Ataqatigiit aamma allannguutissatut siunnersuutinik arlalinnik saqqummiipput, tamarmilli akuerineqanngillat.
Great Greenlandimut 15 millionit koruuninik aningaasaliisoqarniarnera 1 millionit koruuninik ilaatigut ikilisinniaraluarpaat, Inuit Ataqatigiilli allannguutissatut siunnersuutai nutaat akuerineqanngillat.
Aamma atuaruk IA: Aningaasanut inatsit eqqarsaatigeqqissaagaanngilaq
Inatsisartuni oqallinnermi aamma allamik pisoqarpoq.
Partiit Naalakkersuisuutitaqartut oqaasiqanngillat
Partiit naalakkersuisuutitaqartut, Siumut, Demokraatit aamma Atassut inatsisartuni ilaasortaatitaat tamarmik oqallinneq tamaat oqaaseqanngillat.
Tamannalu Inuit Ataqatigiit siulittaasuat Sara Olsvigip ajuusaarutigaa.
- Ippigisuutigisarput tassaavoq, Naalakkersuisuutitaqartut partiivisa ataasinnguamilluunniit oqaaseqartoqanngimmat. Inatsisartoqarneq tassaavoq inersuarmi oqaloqatigiinneq. Tassanilu siunertaq tassaavoq innuttaasut, taavalu aamma Inatsisartuni ilaasortat allat ilisimassagaat partiit ataasiakkaat sooq taasinermisut taasinersut, Sara Olsvig oqarpoq.
Partiit Naalakkersuisuutitaqartut nipaannerat Partii Naleqqamit aamma ippigineqarpoq.
Aamma atuaruk 2015-imut aningaasanut inatsit Partiit oqaluuserisassaat
- Nunatta ingerlannerani oqaasissaqarnerpaatut taasariaqarput. Tassami taakkuupput naalakkersuisoqatigiinnissamut isumaqatigiissuteqarsimasut, aammalu assigiinngitsutigut inuiaqatigiinni iluarsagassanik aaqqitassanillu siunnersuuteqassallutik suliaqartut. Taamaattumik Nunatta aqunneqarneranut inatsit pingaarnerpaaq pingajussaarneqarluni suliarineqarnerani oqaaseqannginnerat tupinnaqaaq, Partii Naleraq sinnerlugu inatsisartunut ilaasortaq Anthon Frederiksen oqarpoq.
Partiilli illua tungiliuttut paatsuungassutissaqanngitsut, Siumut sinnerlugu inatsisartunut ilaasortaq Jens Immanuelsen isumaqarpoq.
- Tusagassiorfinnut nalunaarutigaagut suut Naalakkersuisunut isumaqatigiissutiginerigut. Taamaattumik paatsuungasuusaartoqarsinnaanngilaq, paatsuungasoqarsinnaananilu. Taakku siusissukkut pipput, Naalakkersuisut aningaasamut inatsimmi isumaqatigiiffiginiarneqarneranut tunngatillugu. Qamani oqaaseqannginnerput inersuarmi uteqattaarneqarpoq. Una oqaatigeqqissavara, siusissukkulli aningaasanut inatsimmi eqqartuinitsinnut taakkartoriikkagut aallaavigalugit, immikkut tunngavissaqalersimanngilagut saqummiunneqartunut oqaaseqarnissatsinnut, Jens Immanuelsen oqarpoq.
