IA: Aningaasanut inatsit eqqarsaatigeqqissaagaanngilaq
Aningaasanut inatsit eqqarsaatigeqqissaagaanngilaq, - aamma isertitassat aningaasartuutissallu oqimaaqqatigiissanersut naluarput.
Inuit Ataqatigiit aningaasanut inatsit, ullumikkut saqqummiunneqartoq, pillugu ilaatigut taama oqariartuuteqarput.
Aningaasaqarnermut Aatsitassarsiornermullu Naalakkersuisup Anda Uldumip Inuit Ataqatigiit isornartorsiutaat paasiuminaatsippai.
Aamma atuaruk VIDEO Aningaasanut inatsisissaq atsioqatigiissutigineqartoq
2015-imut aningaasanut inatsit Atassummit, Siumumit Demokraatinillu atsiorneqarpoq. Inuit Ataqatigiilli atsioqataanngilaq.
Naak partiip taassuma amerlanerussuteqarluni isumaqatigiissuteqarneq pingaartillugu oqaatigisaraluaraat, nunatta karsiata imaasa qanoq atorneqarnissaannut siunnersuummi tapersiinngilaq.
Nassuiaallu uaneralaannguamiipppoq. Inuit Ataqatigiimmi suna atsiussanerlugu paaseqqaartinnagu atsiorusunngitsut, Inuit Ataqatigiit siulittaasuat Sara Olsvig oqarpoq.
- Aningaasanut inatsisip suliarineqarnerani apeqquterpassuit Naalakkersuisunut ingerlannikuusagut ataatsimiititaliakkoorlugu aamma toqqaannartumik suli akineqanngillat. Taamaammallu uagut ullumikkorpiaq atsiornissatsinnut tunngavissaqanngilagut.
IA: amingartunik paasissutissinneqarpugut
Naalakkersuisunit Sara Olsvig amingartunik paasisissutissinneqarsimalluni misigivoq. Tassami akileraarutit akitsuutillu Naalakkersuisut qaffanniarneraat, iliuusissat assigiinngitsut kingunerisinnaasaat suunersut taavalu aaqqissuusseqqinnerit tunngavilersorluarneqarsimanersut akissutissarsisinnaasimanngilaq.
Inuit Ataqatigiit atsiorsimannginnerannut Anda Uldum ugguarpoq, taannami isumaqarpoq Inuit Ataqatigiit apeqqutigisarsimasaat akilluartarsimallugit.
- Paasinngilarput sorpiaat isumaqatiginnginnamikkit uani peqataarusunnginnersut. Taanna aamma uggornarpoq. Oqaloqatigiinnikkut tamakku qaangerneqarsinnaagamik oqareernittuut naggatissaa tikillugu isumaqatigiinniarfigalugit oqariartuutigisaqattaarpara siammasissumik suleqatigiinniarta innuttaasut tamanna piumasarivaat, Anda Uldum oqarpoq.
Inuit Ataqatigiit aningaasanut inatsit pillugu aningaasaqarnermut ataatsimiitaliami suli suleqataaniartut, Sara Olsvig oqarpoq.
Anda Uldumilli ilimaginngilaa aningaasanut inatsit pingajussaaneernissaanut arlaannik allannguuteqartoqassasoq.
