Akissuteqartoq: Kalaallit Nunaat tusagaanerminit pitsaaneruvoq
Søren Espersenip, Dansk Folkepartimeersup, Kalaallit Nunaata aningaasarsiorneranik, nunatsinnilu politikerit aaqqissuusseqqikkusunnginnerannik oqarluni maajip naalernerani oqaasiinut Randi Vestergaard Evaldsen taama akissuteqarpoq.
Siusinaarluni soraarnerussutisiaqalersinnaanissamut, utoqqalinersiuteqalernissamut aaqqissuusseqqittoqarnissaa Inatsisartuni ukiaq ataatsimiittoqarnerani aalajangiiffigineqartoq, taassuma oqaatigaa, soorlu aamma soraarnerussutisiaqalernissamut akilersuinermi ilanngaatip aaqqissuuteqqinneqarnissaa qanittukkut aamma aalajangiiffigineqaqqartoq oqaatigigaa.
Missingersuutinut inatsit aalisarnermullu inatsit allanngortinniarneqalersut Demokraatit siulittaasuata aamma oqaatigaa, soorlu aamma utoqqalinersiuteqalernissat pinngitsoorani akilersuisoqartalernissaanut siunnersuuteqartoqartoq, Kalaallit Nunaatalu aningaasanik attartuinerminut atatillugu nunanut EU-mut ilaasortaasunut naleqqiullugu inissisimalluarnerusoq aamma taakkartoraa.
Aamma atuaruk Espersen Nunatta aningaasaqarneranik isornartorsiuisoq
Politikerit Danmarkimeersut aningaaseriviillu Kalaallit Nunaat pillugu Nunatsinnilu suliniutit pillugit ernumassuteqartariaqaratik ernumasartut, Randi Vestergaard Evaldsen aamma isumaqarpoq.
Nuup mittarfiata aningaasalersorneqarnissaa pillugu Kalaallit Nunaata USA-mut saattariaqarsimanera Evladsenip assersutigaa, aningaaseriviimmi Danmarkimeersut ernianik qaffasippaanik piumasaqarmata:
- Kalaallit Nunaata unammilligassaanut atatillugu ikiuiniaruit, taava pissutsit atuuttut piviusut aallaavigalugit isornartorsiorneqartariaqarput, Aningaasaqarnermut Aatsitassanullu Naalakkersuisoq aviisimut Jyllands-Postenimut naggasiivoq.