Espersen Nunatta aningaasaqarneranik isornartorsiuisoq

Aviisimi Jyllands-Postenimi oqallissaaruteqarluni Espersen allappoq, kalaallit politikeriisa nunap aningaasaqarnerata illorraap tungaanut saatsinniarnissaanik suliaqaratik namminiilivinnissaq sammivallaaraat.

Aamma isumaqarpoq Nunatsinni aaqqissuusseqqinnissat pillugit piviusorsiortumik iliuuseqartoqanngitsoq.

- Taamaaliornikkut imaqanngitsumik piviusorsiunngitsumillu namminiilivinnissaq pillugu oqallinnermut piffissaq nalituupilussuaq atorneqarpoq.

Takorluukkersaarutigineqartut ima nukillaarsaataatigaat allaat inuiaqatigiinni naammassisassat tunulliunneqartuartuarlutik, Søren Espersen taama allappoq.

Nunatsinni takornariartitsinikkut ineriartortitsineq Islandimut aamma sanilliuppaa, Islandimummi takornariartartut ukiualuit ingerlaneriinnaani amerleriarujussuarsimapput, siornalu takornariat 1 millioninit amerlanerusut nunamut tikissimallutik.

Nunatsinnut naleqqiullugu 20-riaammik amerlanerupput - naak Kalaallit Nunaat "tikeraassallugu pilerinarnerungaatsiaraluartoq", Espersen taama isumaqarpoq.

- Kalaallit tungaannit isumaqartoqarpoq mittarfiit takissusaat apeqqutaasut. Islandilli takornarianit ornigarluarneqartaerneranut pissutsit tunngaviulluinnartut allat pissutaasut, Espersen allappoq.
Søren Espersen naapertorlugu, nunatta akiliisinnaajunnaarnissaa Danmarkip akuerinavianngilaa, tamannalu kalaallit politikeriinit isumalluutigineqarpallaartoq, Espersen allappoq.