Isertitsivinni sulisut kattuffiat: Akissarsiat qaffanneqartariaqarput
Naalagaaffiup Kalaallit Nunaanni atorfeqartitai siorna ukiakkut nutaamik isumaqatigiissusiorput, taakkununnga ilaallutik Pineqaatissinneqarsimasunut isumaginnittut. Tassani akissarsiaat ukiut sisamat ingerlanerini tre procentimik qaffapput.
Taamaaliornerli danskit kalaallillu akissarsiaasa assigiinngissusaannik annikillisitsinngitsoq, René Larsen Danmarkimi Isertitsivinni sulisut kattuffianni allattaasoq oqarpoq.
- Suliffik pissanganarsinnaasorujussuuvoq, inuussutigisinnaanngikkaannili iluaqutaanngilaq.
LÆS OGSÅ Politiformand utilfreds med ny overenskomst
Nunatsinni Isertitsivinni sulisut tapisiartaat ilanngunnagit qaammammut koruuninik 18.300-sisarput; taakku Danmarkimi suliamik assinginik sulisunit koruunit 5000-it sinnerlugit appasinnerupput.
Taamaattumik Isertitsivinni sulisut Kattuffiata piumasaraa naalakkersuisut ukioq mannamiit immikkut aningaasaleeqqissasut.
- Kalaallit Isertitsivinni sulisut Danmarikimi assingusuni sulisunit aningaasarsiatigut kinguaattooqqapput, aammalu inuuniutit akii qaffasingaarmata akissarsiatik inuussutigisinnaanagit. Taamaattumik naalakkersuisut Christiansborgimiittut tapiliussatut aningaasaliisariaqarput, kalaallillu Isertitsivinni sulisut akissarsiaat malunnaatilimmik qaffallugit.
Akissarsiat pillugit oqallittoqarnera paasisinnaagaa
Naak akissarsiat assigiinngikkaluaqisut maani Pinerluttunik isumaginnittoqarfik Isertitsivinni sulisussatut ilinniartunik pissarsiuleruttornermini ajornatorsiuteqanngilaq.
Pinerluttunik isumaginnittoqarfimmi pisortap Naaja Nathanielsenip soorunami tamanna nuannaarutigaa, KNR-imullu oqarluni paasilluarsinnaallugu Isertitsivinni sulisut akissarsiat pillugit oqallinnermik aallartitsisoqarusuttoqarnera.
LÆS OGSÅ Politi-ansatte er uenige om feriefrirejse
Inatsisinik atuutitsinermut ministereqarfik KNR-imut nalunaarpoq ministeri Søren Pape Poulsen suliaq pillugu apersorneqarsinnaanngitsoq. Ministereqarfilli innersuussivoq Isertitsivinni sulisut akissarsiaat pillugit ukiup naanerani naammassisussamik qulaajaasoqaleruttortoq