Air Greenlandip qulimiguulia nutaaq iluatsinngitsoortoq

Nunatsinni timmisartortitseqatigiit annaassiniutitut ujaasinermilu atortussaminik S-61-imik pisinissani taamaatiinnarlugu taarsiullugu S-61-i 1965-imi sanaaq iluarsaallugu siunertamut tassunga atorniarpaat.

Annaassiniarnernut ujaasinernullu sullissinissamik isumaqatigiissuteqarnissamik 2015-imi Air Greenland ajugaagami annaassiniartarnerit ujaasinerillu pitsanngorsaaviginiarlugit qulimiguulimmik S-61-mik piseqqippoq.

Qulimiguulilli pisiarineqarami atorneqarnissaminut piareersimasimanngimmat, siunertarineqarsimavoq 2016-ip aallartinnerani atornissaanut piareerneqarumaartoq. Taamali pisoqarsimanngilaq. Ukiup aappaata affaa qaangiuttoq qulimiguulik suli qangattartinneqarsimanngilaq.

AAMMA ATUARUK Qulimiguulik pisiarineqarsimasoq atorneqanngitsoq

Maannali Air Greenlandip S-61-iutitoqarsuani iluarsaanniarlugu aalajangersimavoq. Timmisartortitseqatigiiffik naapertorlugu teknikkikkut piareersarneqarnera arlaleriarluni siusinnerusukkut pereersimammat qaammatit arlallit ingerlaneranni ataasiaqqinniarlugu.

Taamaattumik S-61-i nutaaq qangattartinngiinnarniarlugu aalajangertoqarpoq. Qulimiguulik iluatsinngitsoortoq 17 millioner koruuninik nalilerneqarsimavoq. Air Greenlandip aningaasatigut annaasassaasa annertussusissaannut assigiinngitsut apeqqutaassasut, Air Greenlandimi pisortaagallartoq Jacob Nitter Sørensen taama oqarpoq.

- Qulimiguullip nalinga aningaasatigut annaasassanut apeqqutaassaaq, kingoraartissat qanoq amerlatigisut atoqqinneqarsinnaanerannik suullu tuneqqinneqarsinnaanerannik. Taamaattumik aningaasat tungaasigut qanoq kinguneqarumaarnersoq oqaatigiuminaappoq.

AAMMA ATUARUK Air Greenland pisortartaassaaq