Qulimiguulik pisiarineqarsimasoq atorneqanngitsoq
Air Greenland annaassiniartarnermut ujaasisarnermullu 2015-imi isumaginnittussanngorluni isumaqatigiissuteqarnerminut atatillugu qulimiguulimmik S-61-imik pisivoq. Qulimiguulik annaassiniartarnernut ujaasisarnernullu atugassaasoq, Air Greenlandip taamani nalunaarutigaa. KNR-illi tusarfii naapertorlugit qulimiguulik suli atorneqalinngilaq.
Air Greenlandip SAR-imut, tassa annaassiniartarnermut ujaasisarnermullu 2015-imi isumaginnittussanngorluni isumaqatigiissuteqarnerminut atatillugu atugassat taamani amerliniarpai.
Taamaammat qulimiguulimmik S-61-imik immikkut atortulersukkamik Irlandimi sinerissamik nakkutilliisunit annaassiniartarnermut ujaasisarnermullu atorneqartarsimasumik pisivoq.
Qulimiguulilli pisiarineqarami timmisinnaasimanngilaq. Air Greenlandilli 2015-imut ukiumoortumik nalunaarusiaani atuarneqarsinnaavoq, 2016-ip qeqqani atorneqarsinnaasunngussasoq.
KNR-illi tusarfii naapertorlugit suli atorneqanngilaq.
Sioqqanit imermillu innarlerneqarsimagami ingutserneqartariaqarsimasoq, taavalu aamma nammineq sammivissiutaa nunatsinni atorneqaqqusaanngitsoq, tusarfinnit oqaatigineqarpoq.
SAR-imut kiffartuussinermut isumaqatigiissut ukiup naanerani atuukkunnaassaaq, ukiumilli ataatsimik sivitsorneqarnissaa periarfissaavoq.
KNR Air Greenlandimut attaveqareerpoq, akissuteqarnissarlu sulissutigineqartoq tassanngaanniit oqaatigineqarpoq.
