Aaqqissuussamut nutaamut ikippallaartugut
Nittartagaq innuttaasunutt Folketingimi suut oqallisigineqarnissaannik siunnersuuteqarnissamut periarfissiisoq – borgerforslag.dk – Folketingip sapaatip akunnerani matumani saqqummersippaa.
Siunnersuuteqarnissamut piumasarineqarpoq danskisut innuttaassusillit folketingimut qinersisinnaasut ikinnerpaamik 50.000-it siunnersuut atsiorsimassagaat.
Folketingimut kingullermik qinersineqarmat Kalaallit Nunaanni inuit 41.048-t qinersisinnaatitaapput.
Aaqqissuussineq nutaaq malillugu ikinnerpaamik 50.000-it siunnersuummik atsiorsimanissaannut nunap avataani atsiornerit 9.000-it pissarsiariniarneqartariaqassapput, tassalu aatsaat qinersisinnaasut tamarmik siunnersuummik tapersersuippata.
Tamat oqartussaaqataanerat eqqarsaatigalugu tamanna unammilligassaasoq Alternativep Nunarput pillugu oqaaseqartartuata Roger Mathiesenip nassuerutigaa. Partiiami siunnersuummik saqqummiussisuuvoq.
- Ajornartorsiutaasinnaanera takusinnaavara. Katersuukkutta Kalaallit Nunaannut Savalimmiunullu allatut aaqqiinissaq siunertaralugu partiimi oqallisissatut saqqummiutissavara, taanna KNR-imut oqarpoq.
Aaja: Oqaaseqarfigissallugu siusippallaarpoq
Inuit Ataqatigiit Folketingimut ilaasortaatitaata Aaja Chemnitz Larsenip periarfissap atorneqarnera malinnaaviginiarpaa. Kalaallit Nunaannili unammillernartuusinnaanera takorluunngilaa.
- Oqaaseqarfigissallugu siusippallaarpoq. Isumaqarpunga misilittagaqarnissaq pingaaruteqartoq.
Uparuarpaa oqartussaqarfiit amerlanerit Namminersorlutik Oqartussanit tiguneqareermata, Folketingillu akuleruffigisassarinngikkai.
AAMMA ATUARUK Namminiilivinnerup Danmarkimit ikiorsiissuteqartarneq unitsissavaa
Naalagaaffiulli oqartussaaffiinut tunngasut pillugit arlaat siunnersuutissaqarpat, Chemnitz Larsen nammineq allallu Christiansborgimiittut soorlu qarasaasiatigut inuit attaveqarfigisartagaasigut innuttaasut attaveqarfigisinnaallugit oqarpoq.
Folketingimut siunnersuuteqarusuttut siunnersuutinilluunniit tapersersuerusuttut iliuusissat knr.gl-imi takuneqarsinnaapput.
Folketingimili ilaasortat namminneq aalajangissavaat 50.000-init siunnersuutigineqartumik tapersersuerusunnerlutik.
Tunngaviusumimmi inatsit naapertorlugu Folketingimut ilaasortat kisimik oqallisissanik siunnersuuteqarsinnaapput.
AAMMA ATUARUK Åbent brev til Inatsisartuts formandskab