KNR-imit Inatsisartut siulittaasoqarfiannut allakkat ammasut

Inatsisartut ataatsimiittarnerisa radiukkut aallakaatittarnissaannik KNR-i pinngitsaalissallugu Inatsisartut siulittasoqarfiata kissaateqarnera akuliusimannginnissamik tunngaveqarnermik, tusagassiisarfimmik nukittuumik kiffaanngissuseqartumillu qulakkiisussamik, unioqqutitsineruvoq, taamaaliornerlu inuiaqatigiit tamat oqartussaaqataaffigisaat peqqissuusoq nutaaliaasorlu piujuaannartinnissaa eqqarsaatigalugu aamma nangiarnartorsiortitsineruvoq ulorianartoq.

Kiffaanngitsumik tusagassiisarfeqarnissaq, naalakkersuinikkut aqunneqanngitsoq, tamat oqartussaaqataaffigisaannut peqqissumut nutaaliaasumullu pingaaruteqarluinnartuuvoq. Tusagassiorfiit sunik allaaserisaqassanersut aallakaatitsissanersulluunniit naalakkersuinermik suliaqartut peqqusiniarnerat akuerineqarsinnaanngilaq, inaarutaasumimmi inuiaqatigiinni innuttaasut kiffaanngitsumik tutsuiginartumillu paasissutissinneqartarnissaat naalakkersorniarneqarpoq.

KNR pillugu avoqqaarinerit, isornartorsiuinerit oqallinnerillu tamatigut ammaffigineqarput aammalu sulinitsinnut pingaaruteqartuullutik. Kisiannili naalakkersuinikkut toqqaannartumik aqutsineq Innuttaasunik Sullissisussaalluni aallakaatitsiviup tutsuiginassusianik aseruisuussaaq.

TV-kkut, Radiukkut Internettikkullu aallakaatitassanik sammisassanillu aaqqissuisarpugut, taamaaliornitsinnilu atuisartut siunnersuisoqatigiivi, tassaasut inuit qanorluunniit utoqqaassusillit aammalu nunatsinni sumiiffinnit assigiinngitsorpassuarneersut, ukiumoortumik isiginnaartartunik tusarnaartartunillu misissuisarnerit ingerlatseqatigiiffinnit misissuisartunit ingerlanneqartartut, siulersuisut, aqutsisoqatigiit, Innuttaasunik Sullissisussaanitsinnik isumaqatigiissuteqarput, minnerunngitsumillu tusagassiortut tusagassiisartullu innuttaasunik sullissinerup suuneranik ilimasaqarluartut, atortarpagut.

KNR-ip 2018 tikillugu ilanngullugulu sunik aallakaatitsisarnissaa aasaq kingulleq KNR-ip piginnittuisalu – Namminersorlutik Oqartussat – Innuttaasunik Sullissinissamik isumaqatigiissutit atsiornerisigut isumaqatigiissutigaat. Isumaqatigiissutini quppernermi siullermi (qupp. 1) imatut allassimasoqarpoq:

”KNR-ip pisortat sullissisarfiattut namminersortutut Naalakkersuisut nalinginnaasumik ilitsersorsinnaasaata avataniittutut, tak. Radio tv-ilu pillugit inatsit, killiffia tunngavigalugu angusassatut isumaqatigiissut isigineqassaaq. Tamassuma malitsigisaanik sullissisarfiup suliassaasa pingaarnertut aaqqissuunnerinut inatsisitigut isumaqatigiissutitigullu ugguuna killiliunneqartut iluini akisussaaffik KNR-ip siulersuisuisa nammappaat.”

KNR ukiut marlussuit ingerlanerini ineriartupiloorpoq aallakaatitatigullu neqeroorutigut pitsaanerulernikuullutillu nukittunerulernikuupput. Tamanna ilaatigut isiginnaartartutsinnik tusarnaartartutsinnillu misissuinitsigut uuttorsinnaavarput, tassani radiukkut, TV-ikkut Internettikkullu aaqqissuussagut malunnaatilimmik siuariarmata iluarisimaarneqarlutillu. Taamaattumik aallakaatitsiffissap pitsaanerpaap nalaani tusarnaartartutta aallakaatitassiatsinnik nuannarinninnerat sumiginnarlugu Inatsisartut ataatsimiittarnerinik aallakaatitsisalernissarput uagutsinnut ungasippoq.

Naggasiutigalugu pingaarutilinnik marlunnik erseqqissaateqassaagut. Siullermik innuttaasut tamarmik KNR TV aamma knr.gl aqqutigalugit Inatsisartut ataatsimiinnerinik malinnaasinnaapput, taakku toqqaannartumik aaqqissuunneqaratillu aallakaatinneqartarlutik. Nunani allani, soorlu Danmarkimi folketingip kanalia naalakkersuisut namminneerlutik aaqqissuutaraat, Innuttaasunillu Kiffartuussisussaasumik aallakaatitsivimmut akulerunnissartik taakkununnga ungasissorujussuuvoq.

Aappaattut inatsisiliortunut eqqaasitsiissutigisavarput namminneerlutik inatsisiliaat.

Radiukkut tv-kkullu aallakaatitsisarneq pillugu Inatsisartut Inatsisaanni nr. 7-imi, 8. juni 2014-imeersumi § 30 imm. 2.

“KNR-ip suliani aalajangiineri suliffeqarfiup ingerlatsineranut tunngassuteqartut, aqutsinikkut oqartussaasunut allanut ingerlateqqinneqarsinnaanngillat. Sulianili tusagassiornermi ileqqorissaarnissaq aammalu akissuteqartarnissaq pillugit KNR-ip aalajangiineri tusagassiuisarnermi akisussaassuseqarneq pillugu inatsimmi maleruagassat naapertorlugit Tusagassiuisarnerit pillugit Aalajangiisartunut ingerlateqqinneqarsinnaapput.”

Inussiarnersumik ilassinnillunga

Nukaraq Eugenius – KNR-ip siulersuisuini siulittaasoq