Inuussutissarsiutit

Aappaagumut aalisagartassiissutit aalajangersarneqartut

Aappaagumut aalisagartassiissutit Naalakkersuisunit aalajangersarneqarput. Ukioq mannalu aamma qalerallit saarulliillu pisassiissutigineqartut biologit inassutigisaannit malunnaatilimmik amerlanerupput.

Allattoq Anton Gundersen Lihn

decembarip 13-at 2017 07:03

Nutserisoq Simon Uldum -

Kitaani sinerissap qanittuani saarullinniarnermut aamma Upernavimmi, Uummannami Qeqertarsuullu tunuani sinerissap qanittuani qaleralinniarnermut ukioq mannatut amerlatigisut pisassiissutigineqarput.

Avannaani aqutsiveqarfinni pingasuni qaleralittassiissutigineqartut taamaalillutik biologit inassutigisaannit 8.000 tonsinik amerlanerupput.

Saarullinnut tunngatillugu biologit aappaagumut inassutigisaat ukioq mannamit amerlanerulaarput, Kitaanili saarullinniarnermut pisassiissutigineqartut 36.500 tonsiusut biologit inassutigisaata pingasoriaatingajaanik amerlanerupput.

AAMMA ATUARUK Siorna pisat affaanit ikinnerusut tunineqartut

Qeqertarsuup tunuani qaleralinniarnerup ajornartorsiorfiunera ukiaq manna oqaluttuarineqartarpoq. Novembarillu qiteqqunnerani kisitsisit saqqumminneqartut naapertorlugit umiatsiaararsorlutik aalisartut siorna piffissap taamaalinerani qaleralittaat maannakkullu tunisat sanilliukkaanni maanna affaaniit ikinnerupput.

Aalisarnermi pisat ikileriarujussuarnerata peqqutaa oqallisigineqanngaatsiarpoq. Pinngortitaleriffik isumaqarpoq aalisakkat tammarnerannut aalisapilunneq peqqutaasoq, allalli sumiiffimmi imaq kissappallaarsimanerarpaat.

AAMMA ATUARUK De lokale kan mærke hellefiske-krisen

Aappaagumut aalisagartassiissutit aalajangersarneqartut

Aamma atuaruk