Ukiaanerani ataatsimiinneq: Aalisarnermut inatsisissatut siunnersuut ukkatarineqassaaq
Inatsisartut ukiaanerani ataatsimiinnerat tallimanngornermi ammarnersiorneqassaaq.
Naalakkersuisut aalisarneq pillugu inatsisissatut siunnersuutaat aalisartut kattuffiini oqallisaaqaaq. Taavalu aamma avataasiortunut sinerissallu qanittuani aalisartunut amerlaqatigiinnik pisassiisalerniarneq oqallisaaqaaq.
Aalisarneq pillugu inatsisissatut siunnersuut kingusinnerpaamik septembarip 22-ani tusarniaassutigineqassaaq. Pilersaarutaavoq novembarip 16-ani siullermeerneqarnissaa.
AAMMA ATUARUK Sanngiinnerit aalisarnermut inatsisissamit eqqugaasinnaasut
Aalisarnermut inatsisissatut siunnersuut upernaaru aappassaaneerneqarlunilu pingajussaaneerneqassaaq, taamaasillunilu inuiaqatigiinni oqallisigineqarnerusinnaalluni.
Oqallisigineqarnissaalu pingaaruteqaqisoq, partiit naalakkersuisuusut isumaqarput.
- Oqallinnissaq annertooq pisariaqartorlu tikilluaqquarput. Aalisartut kisiisa pinnagit, kisianni inuiaqatigiit sukumiisumik akuutillugit oqallinneq ingerlasariaqarmat, uanimi eqqartorneqarpoq inuiaqatigiit pisuussutaat, Inuit Ataqatigiit oqaaseqartartuat Bendt B. Kristiansen oqarpoq.
Aalisarnermut inatsit Siumumit aamma ukkatarineqarpoq.
- Aningaasat amerlanerpaat maani nunaqartunut nunaqaannarusuttunullu pigineqarsinnaalernissaat kisssaatigigatsigu, Jess Svane oqarpoq.
AAMMA ATUARUK Umiarsuaatileqatigiiffiit eqqartuussivilersuussinissamik Kielsenimut sioorasaaruteqartut
Naalakkersuisuutitaqartuni partiit mikinersaata kissaatigaa siunnersuut suliarilluarneqassasoq.
- Suliassaq imaannaanngitsuuvoq, inuiaqatigiinnut kinguneriumaagassai minnerunngitsumillu aalisartunut inuussutissarsiuteqartunut qanoq sunniuteqassanersoq taanna nalilersorluagassaavoq, Partii Naleqqap oqaaseqartartua Anton Frederiksen oqarpoq.
Neriuutaasimagaluarporli inatsisissatut siunnersuut ukioq manna atuutilersinneqassasoq.
- Kisianni aappaatigut pakatsinarpoq siullermiiginnarneqartussaasutut maanna isikkoqarmat, naatsorsuutigisimagaluaratsigu ukiaq manna tamakkerlugu naammassillugu suliarissagipput, Anton Frederiksen oqarpoq.
Inatsisartut ukiakkut ataatsimiinnertik novembarip 16-ani naggataassavaat.