Aalisarneq pillugu inatsisissaq: Umiarsuaatileqatigiiffiit eqqartuussivilersuussinissamik Kielsenimut sioorasaaruteqartut

Nunatsinni umiarsuaatileqatigiiffiit anginersaat arfinillit aalisarneq pillugu inatsisissatut siunnersuummut assortuussutaasumut tunngatillugu Naalakkersuisunik isornartorsiunertik sakkortuseqqippaat.

Naalakkersuisut siulittaasuannut Kim Kielsenimut toqqaannartumik ataatsimoorlutik allagaqaatiminni, Sulisitsisut peqatigiiffiat GE umiarsuaatileqatigiiffit arfinillit sinnerlugit allappoq Namminersorlutik Oqartussat eqqartuussivimmut suliassanngortinnissaannut piareersimallutik Naalakkersuisullu inatsisissatut siunnersuut tunuartittariaqaraat.
 
Aalisarneq pillugu inatsisissatut siunnersuut maannakkutut isikkoqartillugu akuersissutigineqassappat, eqqartuussivimmut suliassanngortitsisoqarsinnaaneranik inatsisissatut siunnersuummut oqaasertaliussani allassimasoq taamaalilluni piviusunngorsinnaavoq.

AAMMA ATUARUK Umiatsiaqarpallaarneq aalisarnermut iluanaarutissaqartitsinngitsoq

Umiarsuaatileqatigiiffiit taamatut sioorasaaruteqarnerminnut pisassiissutit piffissami killiligaanngitsut Naalakkersuisunit piffissami killiliganngortinniarneqarnerat tunngavilersuutigaat:

- Taamaalilluta isumaqarpugut pigisamik pigiunnaarsitsinerussasoq, GE, allakkamini KNR-ip pissarsiarisimasaani taama allappoq.

- Tamatumalu kingunerisaanik Namminersorlutik Oqartussanit taarseeqqusissuteqarluta eqqartuussivimmut suliassanngortitsisariaqassaagut, GE aamma taama allappoq.

AAMMA ATUARUK Inatsisissatut siunnersuut nangiarnarpallaarpoq

Sulisitsisut Peqatigiiffiat umiarsuaatileqatigiiffiit arfiniliusut sinnerlugit atsiortuuvoq, tassaallutik Ice Trawl Greenland, Imartuneq Trawl, Niisa Trawl, Polar Seafood Greenland, Qajaq Trawl aamma Sikuaq Trawl.

Paasissutissat KNR-ip pissarsiarisimasai naapertorlugit umiarsuaatileqatigiiffiit inatsisissatut siunnersuut inatsisilerituunit naliliiffigitissimavaat, naliliinerlu taanna Kim Kielsenimut allagaqaateqarnermi tunngavigineqarpoq.

AAMMA ATUARUK Aalisarneq pillugu inatsisissatut siunnersuut akisusinnaasoq

Umiarsuaatileqatigiiffiit aningaasanik qanoq amerlatigisunik taarseeqqusissuteqarniarnersut allassimanngilaq, Polar Seafoodilli siulersuisuini siulittaasup Henrik Lethip aviisimut Sermitsiamut siornatigut oqaatigaa milliardit sinnersinnaagai, raajartassiissutit piffissami killiligaannginnerat naatsorsuutigalugu umiarsuaatileqatigiiffiit kilisaatinut aningaasarpassuarnik aningaasaliisimanerat tunngavilersuutigalugu.

Isummersuutit

inatsisartut_forarssamling_2017_nils_baum_bureau_for_inatsisartut.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!