Politikki

Aalisarnermut inatsisissap peqqissaarullugu suliarineqarnissaa GE-p neriuutigaa

Sulisitsisut Kattuffiata, GE-p, aalisarnermut naalakkersuisutut ivertinneqaqqammersumut qanimut suleqateqarnissartik kissaatigaa. Aalisarnermut politikkip ersarinnerunissaa GE-mit ilaatigut piumasarineqarpoq.

Allattoq Bibi Nathansen, Sara K. Jakobsen, Pipaluk Høegh

maajip 26-at 2016 12:02

- Landskarsi aningaasameertillugu, soorlu aalisakkanut akitsuutit, akileraarutit, akitsuutillu allat qaffannerisigut aaqqiiniartoqartarnera isornartorsiortuaannarnikuuarput. Aaqqiissuteqarniarnermimi tamakkiisumik suleqatigiinneq pikkoriffigineqarneq ajorpoq, taamasillunilu aalisarnermut politikki ataqatigiittoq ersarissorlu siunnerfigineqanngitsoortarluni, Sulisitsisut Kattuffiani pisortaq Brian Buus Pedersen KNR-imut oqarpoq.

Aalisarnermut naalakkersuisumik ukiut pingasut ingerlanerini maannamut sisamassaat ivertitsisoqarpoq. Atuuffimmilu pingaaruteqaqisumi taarseraattoqartuarnera Sulisitsisut Kattuffiata aalisarnermut kattuffiit allatulli uggoraa.

- Aalisarnermut naalakkersuisoqarfimmi patajaannerusumik ingerlatsisoqartarsimanissaa soorunami neriuutigisimagaluarparput. Taamaattoqanngimmalli allatut ajornaqaaq.

Aamma atuaruk Jeremiassenip aalisarnermut inatsisissaq salliutinniarpaa

Nikolaj Jeremiassenilu suliassarpassuaqartoq, Brian Buus Pedersen isumaqarpoq. Aalisarnermut inatsisissap ukiaru Inatsisartut ataatsimiinneranni saqqummiunneqarnissaa pilersaarutaavoq. Taassumalu peqqissaarullugu suliarineqarnissaa taavalu susassaqartut tusarniaaffigineqarnerusalernissaat Sulisitsisut Kattuffiata kissaatigaa.

Aamma atuaruk Naalakkersuisuusimasup neriorsuutini naammassinngikkai aalisartut isumaqarput

- Suliamut matumunnga tunngatillugu nukingerpallaarneq aqqutissaanngilaq. Suliat imminnut ataqatigiissaattuummata, peqissaarullugu suliarisariaqarparput. Imaatigut nunamilu inuussutissarsiutini susassaqartut soqutigisaqartullu ammasumik oqaloqatigisinnaanngikkaanni aningaasaleerusuttut qimarrassinnaapput, Brian Buus Pedersen oqarpoq.

- Tamatumalu malitsigisaanik aalisarnermut tunngatillugu maleruagassat siunissami nalorniffiulersinnaapput, taamaattoqassappallu ajorluinnassaaq, avammummi niunernermi aalisarneq pingaarnerpaavoq akileraarutitigullu aningaasat amerlasuut suliffippassuillu aarlerinartorsiulersinnaallutik.