Politikki Inuussutissarsiutit

Naalakkersuisuusimasup neriorsuutini naammassinngikkai aalisartut isumaqarput

Aalisarnermi kattuffiit KNAPK-p SQAPK-llu Aalisarnermut, Piniarnermut Nunalerinermullu Naalakkersuisoqarfimmi patajaatsumik ingerlatsisoqarnissaa ujartorpaat. Naalakkersuisuni taarseraattuarneq sanngiissusermik ersersitsisuusoq, sinerissamut qanittumi aalisartut oqarput.

Allattoq Sara K. Jakobsen, Bibi Nathansen

maajip 24-at 2016 12:26

- Uggornarpoq aalisarnermut naalakkersuisoqarfik taamatut ukiut ataasiakkaajusaannarlugit nutaamik naalakkersuisumik ivertitsisarnera. Taannartaa uggornarpoq, SQAPK-mi pisortaq Erik Lange oqarpoq.

Aamma atuaruk Krusep tunuarnissaa Kielsenip ilisimareersimavaa

Aamma atuaruk Olsvigip taarseraattoqarpallaannginnissaa kissaatigaa

Karl-Kristian Kruse naalakkersuisutut neriorsuutini eqquutsinngikkai, pisortap ilanngullugu oqaatigaa.

- Karl Kristian Kruse naalakkersuisuunermini nalaani, aalisarnermut inatsisissaq naammassineqartussaagaluaq, ullumikkumut suli naammasineqanngilaq. Naammassineqanngitsorlu tassa aamma tunuarluni. Taamaammat neriorsuutini eqquutsinngilaa. Maqaasiuaannarsimavarput, utaqqiuaannarlugulu SQAPK-miit, Erik Lange oqarpoq.

Aamma atuaruk Jeremiassenip Enoksen neriullualersippaa

Aamma atuaruk Jeremiassen naalakkersuisunngorpoq

Aalisarnermut inatsisissaq, 2007-mili suliarineqalersoq, peqqissaarullugu suliarineqarnissaa qanorlu ittuunissaanik oqallinnerunissaq piffissanngortoq, KNAPK isumaqarpoq.

- Sukkasuumik naammassinninniarneq matumani tunngaviusinnaanngilaq, kisiannili piviusumik eqqartuilluartoqartariaqarpoq taavalu sunniutissai, ilaatigut allannguinermi sunniutigisinnaasai nalilersorneqarluartariaqarput. Taamaammat isumaqarpunga una oqaaseq atussallugu pitsaanerpaajusoq; peqqissaarulluinnarlugu suliarineqarnera maannakkut aallartinneqartariaqarpoq, KNAPK-p siulittaasua Henrik Sandgreen oqarpoq.