Savalimmiuni Aalisarnermi aaqqissuusseqqinneq ajutooqqajaavoq
Sermitsiaq.AG'p savalimmiuni tusagassiorfik Kringvarp Føroya issuaavigalugu taama allaaserisaqarpoq.
Savalimmiuni naalakkersuisut novembarimili ajornartorsiorput.
Aalisarnermimi aaqqissuusseqqinnerup ukiuni marluni naalakkersuisunit suliarineqareersup atuutsinneqalernissaanut amerlanerussuteqarluni aalajangiisoqarnissaa ajornakusoorsimavoq.
AAMMA ATUARUK Savalimmiuni naalakkersuisut ilungersunartorsiortut
Ajornartorsiut uaniippoq: aalisarnermut akuersissutit maannakkut atuuttut ukiup naanerani atorunnaartussaammata aalisarnermut aaqqissuusseqqinnerup akuerineqarnissaa pisariaqarpoq.
Naalakkersuisuuteqartunit socialdemikratinit inatsisartunut ilaasortat marluk siulliullutik siunnersuummut tapersersuinertik tunuartippaat.
Inatsisissatulli siunnersuutip tallimanngorpat aappassaanneerneqarnissaanut naalakkersuisuutitaqartut allat Framsókn tapersersuisinnaanertik apeqqusersimagaat Sermitsiaq.AG allaaserisaqarpoq.
Partiimi ilaasortaq Hanne Jensen naapertorlugu inuussutissarsiornermut ataatsimiititaliap siunnersuummut suliai allanngortinneqarsimangaarmata nalorninarpoq Framsókn ilumut akuersilluni taaseqataassanersoq.
AAMMA ATUARUK Savalimmiuni politikkikkut suli ilungersunartorsiortut
Partiilli naalakkersuisuutitaqartut pingajuata siulittaasua Bjørt Samuelsen oqarpoq partiit naalakkersuisuutitaqartut siulittaasuisa allannguutissat akuerisimagaat.Taannali ilanngullugu oqarpoq eqqoriarusunnagu ilumut tallimanngorpat siunnersuut amerlanerussuteqartunit akuerineqassanersoq.
- Kringvarp Føroyamili tusagassiortoq Beinta Løwe naapertorlugu aalisarnermut aaqqissuussinissap ajornartorsiutaanera pissutigalugu qinersisoqassanersoq oqaaseqarfigissallugu siusippallaarpoq.
AAMMA ATUARUK Savalimmiuni naalakkersuisoq issittoq pillugu ataatsimiinnermut takkutinngitsoq
- Taamaattumik inatsisissaq akuerineqanngittoorpat taakkununnga assut kamanaassaaq.
Taamaattoqassappalli naalakkersuisuutitaqartunut aalisarneq pillugu qineqqusaarsimasunut narrujuumminassaaq, apeqqutaalissaarlu ilumut naalakkersuisuutitaqartut ingerlaannarsinnaanersut naammassiniakkamik annersaat akuersissutigisinnaanngikkunikku.
