Savalimmiuni politikkikkut suli ilungersunartorsiortut
Savalimmiormiut Lagmandiat, Aksel V. Johannesen Centerpartiillu tallimanngornermi ataatsimiipput.
Tusagassiortoq, Beinta Løwe Jacobsen naapertorlugu ataatsimiinneq naalakkersuisut suleqatigiinnerannut tunngavoq.
- Centerparti piumasaqaateqarpoq, tamannalu naalakkersuisut isumaqatigissaneraat apeqqutaalerpoq. Centerpartiip naalakkersuisut ikiussagunigit, iluminni isumaqatigiinnianngippata annaassinnaanagit oqaatigigaa, tusagassiortoq oqarpoq.
Partiimi naalakkersuisuutitaqartumi Socialdemokraatini Inatsisartunut ilaasortat marluk aalisarnermut aaqqissuusseqqinnermut siunnersuummut tapersiinertik utertippaat.
Naalakkersuisut taamaalillutik aalisarnermut aaqqissuusseqqinnermut amerlanerussuteqarsinnaajunnaarput, Beinta Løwe Jacobsenilu naapertorlugu tamanna ajorsangaatsiarneruvoq.
Naalakkersuisunut ajorsarujussuarneq
- Aalisarnermut aaqqissuusseqqinneq ilungersuullugu suliaraat, taamaammat ukiuni marlunni suliaralugu. Siunnersuut aappassaanik saqqummiuppaat, iluminnilu isumaqatigiissuteqartarlutik, taamaakkaluartorli asuliinnartarpoq. Taamaammat aaqqissuusseqqinneq ukioq nutaaq aallartitsinnagu atuutilinngippat tamanna ajorsarnerungaatsiassaaq, Beinta Løwe Jacobsen, Kringvarp Føroyami tusagassiortoq oqarpoq.
AAMMA ATUARUK Aalisarnerup aaqqissuuteqqinneqarnissaa illuatungilerneqarpoq
Aalisarnermummi akuersissutit maanna atuuttut ukiup naanerani atorunnaartussaapput, taamaammat Aksel V. Johannesenip aaqqissuusseqqinnerup atuutilersinnissaa iluatsinngikkuniuk qinersititsisoqassanersoq isumaliutigineqarpoq.
Beinta Løwe Jacobsenip oqarnera naapertorlugu Lagmandip periarfissani suli tamakkinngimmagit, qinersisoqassanersoq maannangaaq eqqartulernissaa siusippallaartoq.
- Periarfissat ilaat tassaavoq, aaqqissuusseqqinnerup kinguarteqqilaarnissaa ilaannaaluunniit, periarfissaq alla tassaavoq naalakkersuisut siunnersuummi allannguinikkut iluminni isumaqatigiinniaqqinnissaat, 17-inillu taperserneqarneratigut atuutilersillugu, Kringvarp Føroyami tusagassiortoq Beinta Løwe Jacobsen oqarpoq.
Savalimmiormiut naalakkersuisuisa Centerpartit isumaqatiginiarlugit arfininngorpat ataatsimeeqatigeqqissavaat.