Savalimmiuni naalakkersuisoq issittoq pillugu ataatsimiinnermut takkutinngitsoq

Ministerit, ambasssadørit, direktørit, borgmesterit ilisimatuut allallu inuit Danmarkimi, Kalaallit Nunaanni Savalimmiunilu qaffasissumik inissisimasut ullumi Danmarkimi nunanut allanut tunngasunut ministereqarfimmi ataatsimeesuarput.
Suka K. Frederiksen, Kronprins Frederik, Anders Samuelsen ved konferencens start Foto: Martine Lind Krebs
decembarip 01-at 2017 11:47

Ataatsimeersuarnerup Nalaalagaaffiit Peqatigiit nungusaataangitsumik ineriartortitsinissaannik anguniagaani Issittumi qanoq atorneqarsinnaanersut ataatsimeersuarnermi sammineqarput.

Peqataasussalli ilaat Savalimmiuni nunanut allanut tunngasunut ministeri Poul Michelsen takkutinngitsoorpoq. Peqataannginninni marlunnik peqquteqartoq KNR-imut ima oqaluttuaraa:

- Siullertut maannakkut aalisarnermut inatsipput pillugu uiverneqarpoq. Aappaattut Kalaallit Nunaata, Islandip Savalimmiullu isumaqatigiissutaat pillugu Nunanut allanut ministereqarfillu saqitsaassuteqaratta, ullumikkut najuunnissara kissaataanngittutut misigigakku.

Nunat avannarliit killiit: Kalaallit Nunaata, Islandip Savalimmiullu aggustusip 31-anni suleqatigiinnissamik isumaqatigiissutaat saqitsaassutaalersimavoq. Poul Michelsen naapertorlugu nunanut allanut tunngasunut ministereqarfimmit Savalimmiut Kalaallit Nunaatalu nunanut allanut attaveqarsinnaanerannik qaangiinerarneqarmata.

- Savalimmiormiut kalaallillu suliaannut akulerunnertut kanngunartutut tamanna isigigakku, taanna oqarpoq.

AAMMA ATUARUK Regeringskrise på Færøerne

Savalimmiormiulli atorfilippassuit politikerillu allat ataatsimeersuaqataapput. Taakku ilagaat Magni Arge, partiimit Tjodveldimeersoq. Naallu Arge ministerimi isornartorsiuinera isumaqatigigaluarlugu, Savalimmiullu annermik nunanut allanut attaveqarsinnaanerat annertuserusukkaluarlugu, ugguaraa ministerini ataatsimeersuarnermut peqataanngimmat.

- Ataatsimeersuarneq peqataaffigerusukkunnaarnagu kissaatigissagaluarpara maani ersarissumik nalunaaruteqariartornissaa, taanna oqarpoq.

Poul Michelsenip ataatsimeersuarnermi peqataannginnera Kalaallit tungaanniit paasiuminaatsinneqarpoq. Aqqaluaq B. Egede oqarpoq kalaallit politikkerinngikkaat suleqatigiiffiusinnaasunut takkutinngitsoortarnerit.

-Isumaqatiginngisat qimarratigiinnarlugit ingerlatsisalissagaluarutta nunarsuarmioqatigiit sulinerat ajotrnartorsiulissaaq. Taamaammat isumaqatiginngisat ornillugit, oqaluullugit aammalu naaperiarfissarsiorluni sulinissaq ernersuukkusunneruara, Aningasaqarnermut naalakkersuisoq Aqqaluaq B. Egede oqarpoq.

Qallunaat nunanut allanut tunngasunut ministeriata Folketingimi najuutissagami ataatsimiinneq qimajaarpaa, oqaasissanili imaattut KNR-imut nassiuppai:

- Qallunaat Naalakkersuisuisa Savalimmiut, Kalaallit Nunaata, Islandillu pitsaasumik pissarsiaqaataasumillu suleqatigiinnissaat kissaatigaat. Taamaaliornissaannut assersuerusunngilagut - naamivik. Suleqatigiinerli sinaakkutaasut atuutereersut naapertorlugit pisariaqarpoq, tassalu inatsisit, matumanilu aamma tunngaviusumik inatsit, naapertorlugit.

Nunanut allanut tunngasuni, Savalimmiut isumaqatigiissutigisinnaasatsinnik pingaartunik soqutigisaqarfigisaani, Savalimmiut naalakkersuisuinik pitsaasumik sueqateqarnissaq qallunaat naalakkersuisuinut qitiulluinnarpoq.

AAMMA ATUARUK Savalimmiut nunanut allanut politikkikkut pissaaneqarnerulerlik