PITUFFIK Aajap danskit ministeriat Pituffik pillugu isumasioqatigiinnissamut aggersarpaa
Aaja Chemnitz Larsenip erseqqissarpaa sullissinissamut isumaqatigiissummi aningaasat isertittakkat Kalaallit Nunaanni akileraarutitigut isertittagaasa 10 procenterigaat.
- Taamaattumik suliaq pillugu qulaajaasariaqarpugut, kalaallillu soqutigisaat siunissamut qulakkeerlugit.
- Ilutigitillugu nunanut allanut tunngasunut ministerip suliamut akuusimanera suli tamakkerlugu qulaarneqanngimmat, isumasioqatigiinnissamut aggersaavugut, Aaja Chemnitz Larsen tusagassiuutinut nalunaarummi allappoq.
Aamma atuaruk Kielsen: Nalunaarusiap oqariartuutai ersaripput
Aamma atuaruk Qujaukitsoq: Atorfilinnik soraarsitsisoqarnavianngilaq
Sullissisussarsiornerup allanngortinneqarnerata kinguneraa, sullissinissamik isumaqatigiissut katillugit 2,4 milliarder koruuninik nalilik amerikamiut pigisaannit Exelis Servicesimit tiguneqarmat.
Tamatuma kingorna USA-mi eqqartuussiviit ilaannit isumaqatigiissut atorunnaarsinneqarmat, Greenland Contractorsinut isumaqatigiissut sivitsorneqarpoq, siornalu oktobarimi atorunnaarluni, ukiumik affamik sivitsorneqarsinnaalluni.
Aamma atuaruk Eqqartuussissuserisup Pituffik pillugu suliamik misissuinera uani atuaruk
Aamma atuaruk ATAATSIMUT ISIGALUGU Pituffimmi kiffartuussinissamik isumaqatigiissutip annaaneqarnera
Eqqartuussissuserisup nalunaarusiaa, Naalakkersuisunit suliakkiutigineqarsimasoq, sapaatip akunnerani kingullermi saqqummiunneqarpoq. Tassani Namminersorlutik Oqartussat suliamut atuuffia ersersinneqarpoq, taamaattumillu Inuit Ataqatigiit Enhedslistenillu Kalaallit Nunaat pillugu oqaaseqartartua, Christian Juhl, Nunanut allanut tunngasunut ministerip suliamut qanoq attuumassuteqarsimanerata misissorneqarnissaa amigaatigaat.
Apeqqutit uku isumasioqatigiinnissami akeqquneqarput: (IAfolketingimi.dk)
1. ”2013-imi pisup ingerlanerani Nunanut Allanut Ministeriaqarfiup atuuffianut iliuusaanullu ministeri nassuiaaqquneqarpoq, tassami taamani Pituffimmi kiffartuussinissamut isumaqatigiissummut atatillugu ingerlatsiviit danskinit kalaalliniillu pigineqarnissaannut piumasaqaatit allannguiffigineqarput, taamatullu piumasaqaatit suna pillugu allanngortinneqarnissaannut patsisit, piumasaqaatillu allanngortinneqarnissaannut ingerlaatsimi kikkut akuusimanerannik paasissutisseeqquneqarpoq. Tassani Pituffimmut atatillugu advokatinit nalunaarut pineqarpoq, ilaatigut ima allassimasoqarmat “Danmarkimi Nunanut Allanut ministeriaqarfik naalagaaffiup nunanut allanut politikkianut suli akisussaasuusoq, Nuummi Nunanut Allanut Pisortaqarfimmeereernermini piumasaqaatit allanngortinneqarnissaannik aalajangiivoq” (nam. nutsigaq), kiisalu piumasaqaatit allanngortinneqarnerannut kammeradvokatip allakkiaa pineqarluni.
2. Ingerlatsiviit USA-meersut ingerlatsisinnaanerisa akuersissuteqarfiginissaannut Nunanut Allanut ministeriaqarfik eqqarsaatinik tunngavigineqartunik nassuiaaqquneqarpoq, tassani kalaallit soqutigisaasa isumagineqarnissaannit Danmarkip EU-mi suliariumannittussarsiuussinernut malittarisassaasa malinnissaat soqutigineqarnerusimanersoq ilanngullugu.
3. ”Pituffimmi kiffartuussinissamut isumaqatigiissummut maanna pineqartumut atatillugu ukiup ataatsip matuma siornatigut suleqatigiissitat marluk pilersinneqarput, taakkunanilu ingerlatsiviup danskiusup kalaalliniillu pigineqartup suuneranik nassuiaqquneqarpoq, kiisalu kiffartuussinissamik isumaqatigiissutip Kalaallit Nunaannut iluaqutaanerpaaffissaanik, aammalu isertitassatigut annaasaqaatit Kalaallit Nunaannut qanoq taarserneqarnissaannut tunngasunik paasisaqquneqarlutik. Suleqatigiissitat suliaannut tunngasunik suli tusagaqanngilagut. Suleqatigiissitat suliaannut tunngasunik ministeri nassuiaaqquneqarpoq, kiisalu kalaallit soqutigisaasa siunissami qanoq qulakkeerneqarsinnaannerannut naalakkersuisut isuliuusaannik nassuiaaqquneqarluni, qanoq ililluni kiffartuussinissamut isumaqatigiissutip kalaallit/danskillu ingerlatsiviannit isumagineqarnissaanik qulakkeerinnittoqassanersoq ilanngullugu.
