Aaja Chemnitz Larsenip danskit naalakkersuisui nassuiaateqartikkusukkai
Danskit nunanut allanut tunngasunut ministereqarfiata Savalimmiut, Kalaallit Nunaata Islandillu akornanni nunanut allanut tunngasut pillugit suleqatigiinnissamik isumaqatigiissut atorunnaarsimmagu Danmarkip, Savalimmiut nunattalu akornanni attaveqarnermi ajornartorsiortoqalerpoq.
Nunat taakku pingasut atorfilittut ministereqarnikkullu ataatsimiinnissamik, soqutigisaqaqatigiiffimmilu suliani oqaloqatigiissuteqarnissamut isumaqatigiissuteqarput. Tamatumani ilaatigut nunanut allanut politikki niuernerlu pineqarput. Danmarkilli nunatta Savalimmiullu nunanut allanut tunngasut akisaaffiginngimmagit isumaqatigiissut taanna atorunnaarsippaa.
Aaja Chemnitz Larsen Folketingimi ilaasortaallunilu Inatsisartuni nunanut allanut tunngasunut sillimaniarnermullu politikkimut ataatsimiititaliami siulittaasuuvoq. Atuuffinilu taanna atorlugu danskit tungaanniit nassuiaateqartitsiniarpoq.
- Danskit naalakkersuisui sooq isumaqatigiissummik atorunnaarsitsisimanersut nalinginnaanerusumik nassuiaateqaqquniarpakka, Chemnitz Larsen KNR-imut oqarpoq.
Tamanna ilutigalugu Aaja Chemnitz Larsenip naalakkersuisut isumaqatigiissuteqaraangamik malittarisassaminnik nakkutiginnilluarnissaanik kaammattuuteqarfigaakka.
- Uanilu isumaqatigiissuteqarnermi arlaatigut arajutsisaqarsimanissaq ernumanarsinnaavoq. Niuerneq killilersugaanngitsoq pillugu suleqatigiinnissamik isumaqatigiissuteqarnerup siunertaa paasisinnaavara. Isumaqarpungali aamma najoqqutassat inissinnissaat pingaaruteqartoq.
AAMMA ATUARUK Savalimmiormiut nunanut allanut ministeriata Danmark tupaallaatigigaa
Danmarkip nunat pingasut akornanni isumaqatigiissummik atorunnaarsitsinera savalimmiormiut nunanut allanut tunngasunut ministeriata, Poul Michelsenip isornartorsiungaatsiarpaa, Danmarkilu ingattarsersoraa.
- Politikkimik eqqartuiniarsarivugut. Tamannaana pineqartoq. Isumaqatigiissullu una uagut Danmarkillu akornanni juramut saatinniarsarineqarpoq, tamannalu isumaqarpunga asuli oqalunnerusoq (…). Imarisaa nunat akornanni inatsisinut aalajangersimasunut arlaatigulluunniit pituttorsimanngilaq, Poul Michelsen oqarpoq.
AAMMA ATUARUK Isumaqatigiissut Naalagaaffeqatigiinni nunanut allanut politikkikkut assortuussutaalersoq