Isumaqatigiissut Naalagaaffeqatigiinni nunanut allanut politikkikkut assortuussutaalersoq

Nunatta, Savalimmiut Islandillu akornanni suleqatigiinnissamik isumaqatigiissut danskit naalakkersuisuinit atorunnaarsinneqarpoq, ilaatigut Namminersorneq pillugu inatsimmik unioqqutitsinera pissutigalugu, danskit nunanut allanut tunngasunut ministereqarfiat taama isumaqarpoq. Nunanut allanut naalakkersuisup Danmarkimit qisuariaatigineqartoq paasisinnaannginnerarpaa.

- Ilisimaneqareersutut danskit naalakkersuisuinut immikkoortuni arlalitsigut isumaqataasanngilagut.

Nunanut allanut naalakkersuisoq, Suka K. Frederiksen, suliaq Naalagaaffeqatigiit akunnerminni assortuussutigisaattut taaneqarsinnaasoq pillugu tusagassiorfinnut nalunaarummi taama allappoq.

Pineqartoq tassaavoq isumaqatigiissut Nunatta, Savalimmiut Islandillu Nunat Avannarliit Killiit Siunnersuisoqatigiiffiata Reykjavikkimi ukioq manna aggustip 31-ani atsioqatigiissutigisaat. Nunatsinnit naalakkersuisoq Erik Jensen, Suka K. Frederiksenip napparsimalluni sulinngeqarnerata nalaani taartaasumit atsiorneqarpoq.

AAMMA ATUARUK Savalimmiut nunanut allanut politikkikkut pissaaneqarnerulerlik

Isumaqatigiissummi anguniagaasoq Naalakkersuisut, Savalimmiuni naalakkersuisut Islandimilu naalakkersuisut akornanni niuernikkut 'suliassaqarfinnilu ataatsimoorullugit soqutigisaqarfigineqartuni allani', nunanut allanut politikki ilanngullugu, suleqatigiinnerup nukittorsarnissaa, isumaqatigiissummi taama allassimavoq.

Danskit Nunanut allanut tunngasunut ministereqarfiat naapertorlugu Savalimmiuni Nunatsinnilu naalakkersuisut isumaqatigiissummi pisinnaaffitik qangersimavaat, Danmarkilu akuutinnagu Islandip naalakkersuisuinik isumaqatigiissuteqarsimallutik.

Taamaattumik nunanut allanut tunngasunut ministeri Anders Samuelsen naalakkersuisunut taakkununnga allagaqarpoq isumaqatigiissut atorunnaarsillugu.

Nunanut allanut tunngasunut ministereqarfik: Inatsisit malinneqanngillat

Nunanut allanut tunngasunut ministereqarfik naapertorlugu nunat pingasuusut Kalaallit Nunaanni Namminersorneq pillugu inatsit aamma Savalimmiuni Piginnaatinneqarlutik Isumaqatigiissut unioqqutinneqarput. Tamatumunngalu pissutaasoq taassaavoq nunanut allanut politikkip oqaloqatigiissutiginissaa pillugit naapeqatigiittarniarlutik aammalu pisariaqassappat suliassaqarfiup tamatuma iluani isumalioqatigiissitanik pilersitsisoqarsinnaasoq, danskit tungaannit taama oqaatigineqarpoq.

- Sammisaq nunanut allanut tunngasunut politikki isumaqatigiissummi pineqartoq Savalimmiut Kalaallit Nunaataluunniit tigusinnaanngilaat, nunap immikkoortuiniittut isumaqatigiinniutigisinnaanngilaat Naalagaaffeqatigiillu sinnerlugit isumaqatigiissutigalugit, Nunanut allanut tunngasunut ministereqarfik KNR-imut allakkatigut nalunaarpoq.

Suka K. Frederiksenili isumaqarpoq Danmarkip suliaq kukkusumik qisuariaateqarfigigaa.

- Naalakkersuisutut suliassaqarfinni suliaqarninni aaqqiissutissarsiornissamik ujartuineq pingaartitaraara, tamatumalu saniatigut aamma nunanut allanut ministeriaqarfiup aggustip aallaqqaataani 2017 nunat avannarliit killiit suleqatigiinnissamut isumaqatigiissutaat pillugu Namminersorneq pillugu inatsisip qanoq paasineqarsinnaanerannik oqariartuutaat apeqquserluarsinnaallugu. Isumaqarpungali tamanna danskit tungaaniit silatusaartumik naleqquttumillu aaqqinneqanngitsoq, Suka K. Frederiksen tusagassiorfinnut nalunaarummi taama allappoq.

AAMMA ATUARUK Issittumi ineriartortitsinissaq politikerit oqaluuseriniaraat

Nunanut allanut tunngasunut ministereqarfik: Danmark apereqqaarneqartussaavoq

Naammagittaalliut alla tassaavoq Kalaallit Nunaanni, Savalimmiuni Islandimilu ministerit isumaqatigiissut akuerinnittussamut Danmarkimut apuuteqqaarsimanngimmassuk. Savalimmiuni piginnaatinneqarluni isumaqatigiissummi kaajallaatitami allassimasoq unioqqutinneqarpoq.

- Nunanut allanut tunngasunut ministereqarfiup taakku saniatigut Savalimmiunit Kalaallit Nunaanniilluunniit isumaqatigiinniarneq sioqqullugu pilersaarummik missingiummilluunniit tigusaqarsimanngitsoq ministereqarfik KNR-imut nalunaarpoq.

Piumasarineqartulluunniit arlallit malinneqarsimanngillat. Assersuutigalugu "kunngeqarfik Danmark" isumaqatigiissummi eqqaaneqarsimanngilaq, naak Kalaallit Nunaat Savalimmiulluunniit oqartussaassuseqanngikkaluartut.

Ministerilli savalimmiuneersup Poul Mikkelsenip Københavnimiit akerliliineq itigartilluinnarpaa. Tamannalu sapaatit-akunnerat kingulleq tallimanngornermi ataatsimeersuarnermut Københavnimi ingerlanneqartumut, Savalimmiuni naalakkersuisut danskit nunanut allanut tunngasunut ministereqarfiat Naalakkersuisullu suleqatigalugit aaqqissuunneqartumut peqataannginnermigut ersarissumik takutippaa.

AAMMA ATUARUK Savalimmiuni naalakkersuisoq issittoq pillugu ataatsimiinnermut takkutinngitsoq

Tamanna - ilaatigut Savalimmiuni aalisarneq pillugu aaqqissuusseqqinnissaq pillugu ulapputeqarneq - Danmarkillu isumaqatigiissummut "kanngunartumik" akulerunnera akerleralugu pisoq, Poul Michelsen KNR-imut tallimanngormat taama oqarpoq.

Suka K. Frederiksenilli erseqqissaatigaa suliaq Savalimmiuni suleqatiminit allaanerusumik suliarineqarnissaa kissaatigalugu. Taamaammat danskit nunanut allanut tunngasunut ministereqarfiat suliaq pillugu Namminersorlutik Oqartussanit oqaloqatigineqarpoq.

- Maanna allaffissornikkut Nunanut Allanut Ministeriaqarfik attavigereerparput aammalu aaqqiissutissanik ujartueqatigalutigu. Qanoq isumaqarnerput pillugu Nunanut Allanut Ministeriaqarfik ilisimatereerparput, sooq suliassaq Nunanut Allanut Ministeriaqarfik suleqatigalugu nunat marlut akornanni suliassatut isigineripput, tamannalu maanna ingerlavoq, naalakkersuisoq taama allappoq.

Danskit nunanut allanut tunngasunut ministeqarfiata KNR-imut ilisimatitsissutigaa suleqatigiissutigalugu aaqqiissuteqartoqarnissaa ministereqarfimmit aamma kissaatigineqartoq, isumaqatigiissutip iluarsiissuteqarfigineratigut pigiinnarneqarnissaa sinuertaralugu.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!