ASSIT Aki-Matilda Høegh-Damip angusani tulluusimaarutigai

Kalaallit Nunaanneersoq Aki-Matilda Høegh-Dam peqataasut 300-t akornanni unammeqataavoq. Aki-Matilda Høegh-Dam kusanarluinnartumik angusaqarpoq, tassami normu 6-inngorami.

Naak ajugaanngikkaluarluni Aki-Matilda Høegh-Dam ajugaasutut misigisimavoq.

- Pissangaammilaaraluarpunga nuilerlunga, ilami inuit 500-t isiginnaartussat kisianni eqqaamavara nuannersumik misigalugu, pissangajunnaarlunga nuannaarlunga. Eqqarsarlunga angorusutakka anguakka annikkusutakka annippakka, Aki-Matilda Høegh-Dam angusaminik tulluusimaaqisoq oqarpoq.

Aamma atuaruk Miss BT Nunatsinneersuuvoq

Taanna oqaluttuarpoq misigisaq unammillernaraluaqisoq nunatsinnit tapersersornerluarneqarnermigut taama angusarissaartigaluni.

Misigisarli nuanneraluaqisoq Aki-Matilda Høegh-Damip Miss Danmarkimut peqataaneranut qisuariaatit assigiinngitsorpassuusimapput.

"Kalaaliviunngilatit"

AG-ip allaaserereeraalu oqallinnersuaqalerpoq. Tassami Aki-Matilda Høegh-Damip qaamasunik pisataqarnera peqqutigalugu amerlasuut apeqqusersimavaat ilumut kalaaliviunersoq.

- Kalaallit multikulturelliupput. Imminut aamma sassaalliuppungatakutikkusullugu ilaasa eqqaasaramikku illit affarmik qallunaajuvutit affarmik kalaaliuvutit. Kisianni oqarfigalugit naamik, taamaavimmik affaanngillat kisianni ilivitsuupput. Qallikkut qallunaajorpasippunga aap, kisianni ilukkut kaaliunerpaavunga.

Nuannaarutigaalu oqariartuutini amerlasuut tusarsimammassuk.

Naak angusarissaaraluarluni siunnissami assilisittartuunissani pimorutinngilaa. Københavnillu universitetiani ilinniarnini pimoorukkusunnerullugu.

- Massakkorpiaq atuarnera pingaartinnerpaavara naak nalunaralaurtoq siunissami susoqassanersoq.

Peqqissimissutiginngilluinnarpaalu Miss Danmarkimut unammeqataasimagami.

- Ilimaginngisanniit nuannerneruvoq, Aki-Matilda Høegh-Dam illariaatigaluni oqarpoq.

BT-p atuartartui qaammatip kingulliup taasitinneqarneranni Miss BT-tut toqqagaavoq.