IQ2021 KQ2021 KNR qineqqusaartitsinissarpassuarnut piareerpoq
Apriilip arferngani qinersinissannut tunngavissilluarumallutit KNR qaammatip ataatsip ingerlanerani kommuninut Inatsisartunullu qineqqusaartitsinernik aallakaatitsinissaminut piareerpoq.
Innuttaasut qinersinnginnerminni isummernissaminnut tunngavissilluarnissamik periarfissilluarumallugit qineqqusaartitsinerpaalussuarnik aallakaatitsissaagut, KNR-ip pisortaa Karl-Henrik Simonsen oqarpoq.
Qaammatip ataatsip ingerlanerani qineqqusaartitsinerit 18-it unnummik qinersinerup inerneranik sammisaqarfiusumik naggaserneqartussat aallakaatinneqassapput.
Qineqqusaarnerit aallarnerlugit kommunini innuttaasunik ataatsimiititsinerit nuannarineqarluartartut apeqquteqarfiusinnaasullu sapaatip akunnerata uuma naanerani aallartissapput.
Nutaatut, qinersisartunik ataatsimiititsinerit aqaguani, kommuninut sassartut tusagassiortunit apeqqarissaarfigineqartassapput.
Inatsisartunut qineqqusaartitsinerit aallartippata sassartut qinersisartunit aamma apeqquteqarfigineqarsinnaajumaarput.
Pisarnertulli Inatsisartunut qineqqusaartut tusagassiortunit aamma apeqqarissaarfigineqarumaarput, taakku pingasoriarlutik Nuummiit aallakkaatinneqassapput. Qineqqusaartitsinerit qinersinissaq aqaguppat partiit siuttuinut apeqqarissaarnermik naggaserneqarumaarput.
Pingaarutilimmik annertuumillu suliassaqarpugut, neriuppugullu qinersisartut sassartunut apeqqutinik ersarissunik ingerlateqqitassatsinnik anngusivigisarumaaraatigut. Apeqquteqarluni videoliat tamarmik Facebookimi quppernitsinnut ”KNR-imi qinersineq”-mut nassiunneqartassapput, radiomi pisortaq Alice Sørensen oqarpoq.
Qinersisartunik ataatsimiititsinerit oqallitsitsinerillu tamarmik Covid-19-imut maleruaqqusat malillugit ingerlanneqassapput, tamarmillu radiokkut tv-kkullu aallakaatinneqarumaarlutik.
Aallakaatitat tamarmik tunngaviusumik kalaallisut ingerlanneqartassapput, qallunaatut oqaasillit nutserneqassallutik. Oqaatsit atorneqartut KNR 1-kkut aallakaatinneqassapput nutserneqarnerilu KNR 2-kkut aallakaatinneqassapput.
Aallakaatitsinissarpassuit peqqutigalugit radiokkut tv-kkullu aallakaatitat nalinginnaasut eqqorneqartarsinnaapput.
Qineqqusaartitsinermi aallakaatitassat atuarneqarsinnaapput.
Annertunerusumik paasisaqarusullutit apeqqutissaqaruit radiomi pisortamut Alice Sørensenimut sianersinnaavutit, uunga: +299 36 15 00 imaluunniit uunga mailersinnaavutit: info@knr.gl.
KNR-ip pilersaarutai:
| Kommuninut qinersineq | |
|---|---|
| Kommune Kujalleq: Timersortarfik Qaqortoq | |
| Qinersisartunik ataatsimiititsineq | Arfininngorneq marsip arferngat nal. 15:00 |
| Oqallinneq | Sapaat marsip arfineq-aappaat nal. 15:00 |
| Qeqqata Kommunia: Taseralik Sisimiut | |
| Qinersisartunik ataatsimiititsineq | Marlunngornq marsip qulingiluaat nal. 19:30 |
| Oqallinneq | Pingasunngorneq marsip qulingat nal. 19:30 |
| Kommune Qeqertalik: Katersortarfik Aasiaat | |
| Qinersisartunik ataatsimiititsineq | Tallimanngorneq marsip aqqaneq-aappat nal. 19:30 |
| Oqallinneq | Arfininngorneq marsip 13-iat nal. 15 :00 |
| Avannaata Kommunia: Sermermiut Ilulissat | |
| Qinersisartunik ataatsimiititsineq | Marlunngorneq marsip 16-iat nal. 19:30 |
| Oqallinneq | Pingasunngorneq marsip 17-iat nal. 19:30 |
| Kommuneqarfik Sermersooq: GUX Aula Nuuk | |
| Qinersisartunik ataatsimiititsineq | Arfininngorneq apriilip pingajuat nal. 15:00 |
| Oqallinneq | Sapaat apriilip sisamaat nal. 15:00 |
| Partiit ilisaritinnerat sisamanngornermi marsip 18-ianni nal. 19:30 aallakaatinneqassapput. |
Inatsisartunut qinersineq |
|
|---|---|
| Ilulissat – Sermermiut | |
| Qinersisartunik ataatsimiititsineq | Tallimanngorneq marsip 19-iat nal. 19:30 |
| Aasiaat – Katersortarfik | |
| Qinersisartunik ataatsimiititsineq | Sapaat marsip 21-at nal. 15:00 |
| Sisimiut – Taseralik | |
| Qinersisartunik ataatsimiititsineq | Pingasunngorneq marsip 24-at nal. 19:30 |
| Qaqortoq – Timersortarfik | |
| Qinersisartunik ataatsimiititsineq | Tallimanngorneq marsip 26-at nal. 19:30 |
|
Inatsisartunut qinigassanngortittut apeqqarissaarfigineqarneri Nuummi GU Aulamiit: |
|
|
|
Ataasinngorneq marsip 29-at nal. 19:30 |
| Marlunngorneq marsip 30-at nal. 19:30 | |
| Pingasunngorneq marsip 31-at nal. 19:30 | |
| Partiit ilisaritinnerat | Sisamanngornermi apriilip aallaqqaataani nal. 19:30 |
| Nuuk - GU Aula | |
| Qinersisartunik ataatsimiititsineq | Tallimanngorneq apriilip 2-aat nal. 19:30 |
| Partiit siuttuisa apeqqarissaarfigineqarnerat | Ataasinngorneq apriilip tallimaat nal. 19:30 |
