”Inuummarik” ullumi aallartippoq
Persuttaaneq akiorniarlugu Nunafondep persuttaaneq pillugu suliniutaa ullumi aallartinneqarpoq.
Nunafondip tajat 10.000-it Kina-mi sanatissimavai allaqasut ”Inuummarik”, taakkulu allakerisarfinni tamani tuniniarneqassapput.
Nunafondimi siulittaasoq Jørgen Wæver Johansen oqarpoq, persuttaanermut akiuniarnermut allatulaaq eqqarsarusussimallutik, tajanullu isumassarsiaq Tour de France-mi ajugaasartup Lance Armstrong-ip kræftimut akiuiniarnerminut tajaqartarsimasoq isumassarsiffigisimallugu.
-Tajaqarnikkut takutissavat persuttaaneq akerlerigit, Jørgen Wæver Johansen oqarpoq.
Tajat allakkerisarfinni tuniniarneqartussat inersimasunut 20 kroneqassapput inuusuttuaqqanullu 10 kroneqassallutik. Sinneqartoorutillu saaffiginnittarfinnut qimarnguinnullu tunniunneqassapput.
Tajat saniatigut Nunafondip 100.000 kronit Ulf Fleischerip sinerissami atuarfinni ilinniarfeqarfinnilu oqallisaarisussatut angalanissaanut immikkortitsisimapput, oqallissaarinermilu saniatigut aamma nipilersorlunilu erinarsortassaaq.
