Øystein Slettemark sisorarluni ooqattaasarluni VM-ertoqarnerani iluatsitsinngilaq
Nunarsuarmi pikkorinnerpaat, soorlu Fourcade Frankrigimeersoq, Birnbacher Tysklandimerrsoq, Svendsen Norgemeersoq Ustyugovilu Ruslandimeersoq peqataammata, Slettemark ilimagineqarpallaarsimanngilaq. Ingerlaarnermi piffissaq atugaa ajorpallaanngikkaluartoq ooqattaasarnermi naammaginanngilaq, nr. 125-iullunilu apuuppoq. Ooqattaasarnerni quliusuni arfinileriarluni uniorpoq, tamannalu pillaatitut kaajallaasariaqarneranik kinguneqarluni, taamaammat Øystein Slettemark kingulliungaatsiarluni inissippoq. Peqataasut 136-iusut ullumikkut sukkaniuunneq naammassillugu apuupput.
Ullumikkut sukkaniunnermi medaaliannattut pingasut tassaapput Emil Hegle Svendsen kuultinnattoq, Michael Fourcade silvinnattoq Jakov Fac Sloveniameersoq bronzennalluni. Norgemiup tusaamasap Ole Einar Bjørndalenip nr. 4-ranngornermigut takutippaa 39-nik ukioqaraluarluni suli pikkorinnerpaat akornanniissinnaalluni.
Øystein Slettemarkip unamminissaa angisooq tulleq tassaavoq ujakkaarluni nunarsuarmi pissartanngorniunnissaq qaammatip matuma naalernerani ingerlanneqartussaq.