Århus-imi kalaallit AA-rtaarfittaarput
- Kalaallit imerajuttut amerlasuut naapeqatigiiffissamik amigaateqarsimapput, ajornannginnerusumik kalaallisut oqaatsitik atorlugit misigissutsinik oqaloqatiginniffissamik, Simon Lynge Århus-imi kalaallit illuanni inunnik isumaginninnermik siunnersortit ataqatigiissaarisuat, Jyllands-Posten-imut oqarpoq.
Arnap kalaallip ataatsimiiffik nutaaq AA pilersippaa, nammineq amigaatigisimagamiuk kalaallisut ataatsimiititsineq.
Kalaallit Århus-imi najugallit 1000-it akornanni 150-it inuuniarnermikkut ajornartorsiortut, nalunaarusiami 2008-meersumi erserpoq. Taakkulu kalaallisuumik oqaluffiusartumik amigaateqarsimapput.
Ataatsimiiffimmi Frederiksgade 75-imiittumi sapaatit tamaasa ataatsimiittoqartarpoq ullumikkumulli inuit sisamaannaat takkussimapput.
- Kikkulluunniit tikilluaqqusaapput. Imerajuttut katsorsarneqarnikut sulilu imertartut. Aallartinniarneq ajornartuaannarpoq, neriuppugulli piffissap ingerlanerani takkuttartut amerlissasut, Simon Lynge Jyllands-Posten-imut oqarpoq.
