Ålborgimi kalaallit qulerarterutaat ikiortariaqarput

Ålborgimi kalaallit atugarliortut ikiorneqartorujussuupput.

Inissanik, oqqiffissanik suliniutinillu neqeroorfigitinnerit naammaginaraluartut, suli amerlanerusunik ikiorsiisoqarsinnaasoq, Ålborgip kommuniani nalunaarusiami saqqummersinneqaqqammersumi erserpoq.

Kalaallit 700-t 800-llu akornanni Ålborgimi najugaqarput. 80-it missaat atugarliortuussangatinneqarput, taakku affaasa missaat angutaasut, 25-t 50-illu akornanni ukiullit, suliffeqanngitsut, ikiorsiissutinik pisartagallit aanngaajaarniutinillu assigiinngitsunik akuuillutik atornerluisartut.

Aanngaajaarniutinik atornerluisartut katsorsartittarnerat nukittorsarneqartariaqartoq, kalaallillu ornittagaasa pitsaanerusumik aqunneqarnissaat innersuussutigineqarsimasoq nalunaarusiami atuarneqarsinnaavoq.

Kalaallit Ålborgimi najugaqartut amerlanersaat ingerlalluartuupput. Kalaallit ingerlalluartut namminneq kajungissusertik naapertorlugu nunaqqatiminnik atugarliortunik oqilisaasinnaasuugunik pitsaanerpaassasoq nalunaarusiami allassimavoq.

Ålborgip kommuniani inunnut peqqinnissamullu immikkoortortaqarfiup, Brobyggerselskabep, nalunaarusiaq suliarisimavaa.