Zumap unnerluutigineqaannarnissaa aalajangiuppaat
Jacob Zumap, partiimi pissaaneqaqisumi, ANC-mi siulittaasuusup unnerluunneqarnerata unitsiinnarnissaa eqqartuussivimmi pissaaneqannginnerusumi aalajangerneqaqqaaraluarpoq.
Jacob Zuma niuertumit Indiamiumit 3 milliuuni koruunit pallillugit anngiortumik ikiortissatut akilerneqarsimasutut ilaatigut unnerluutigisasanngortinneqarpoq. Taassuma saniatigut, Jacob Zuma sakkunik tuniniaasartumik, Frankrigimeersumik peqquserlussimasutut unnerluunneqartumit aamma akilerneqarluni illersuiniarsimasutut pasineqarpoq. Jacob Zumap tapersersortai politikkikkut illuatungiliuttut malersuiniarnerannik tamakku aallaaveqartut oqaatiginiarneqaraluartoq, Indiamioq ikiorsimaneragaasoq eqqartuunneqarami ukiuni 15-ini paarnaarussassanngortinneqareerpoq. Taamaakkaluartoq illuatungiliuttut Jacob Zumamik unnerluussiniarlutik eqqartuussisunik sunniiniarnerat miserratigineqarsinnaanngilaq, annertunerusunimmi pinerluuteqarsimasut utaqqisinneqarallaannarmata. Taamaammat imaassinnaavoq illuatungiliuttut sunniiniarnerat pissutaasoq kisianni aamma imaassinnaavoq eqqartuussisut isumaqartut Jacob Zuma inatsisinik ersarilluinnartumik unioqqutitsisimammat unnerluussineq ingerlateqqinniarneqartoq. Eqqartuussisup ullumi oqarneratut; unnerluussinerup ingerlateqqinneqaannarnissaanut pissutaasut apeqquserneqarsinnaagaluarpataluunniit inatsisinik unioqqutitsisimaneq apeqquserneqartariaqanngilaq.
