Zimbabwemi qinersineq ullumi aalajangiiffigineqassaaq

Illuatungiliuttut partiiat Demokratisk Forandring MDC, ajugaasutut imminnut suaarutigaaq. Partiip taassuma nunami eqqartuussiviit qullersaat aqqutigalugu qinersinermi ataatsimiititaliaq pinngitsaalillugu piumaffigaa, qinersinermi inernerit pisortatigoortumik saqqummiuteqqullugit.

Ullut qulit matuma siornagut Inatsisartunut præsidentimullu qinersisoqarpoq, qinersinerillu inerneri suli saqqummiunneqaratik.

Nunami eqqartuussisuunerup Tendai Uchenap saqqummiussinissaa kikkunit tamanit utaqqineqarpoq. Taanna oqarpoq, qinersinermi ataatsimiititaliap præsident Mugabemit pilersinneqarsimasup, Mugabep ajugaasimanermik oqarnera eqqunngitsuusoq, eqqartuussisuunerullu aaqqiagiinnginneq nammineerluni aalajangiiffigisinnaagaa.

Illuatungiliuttut partiiata MDCip siulittaasua Morgan Tsvangirai Sydafrikaliarluni ippassaq aallarpoq, Sydafrika taamatullu nunat tamat præsident Mugabe-mut akerliunerminni tapersersuinissaannik pimaffiginiarlugit.

Zimbabwe 1980-imi Tuluit Nunaannit avissaarmalli Robert Mugabe maannakkut 84-inik ukioqartoq nunami aqutsisuusimavoq.