Zimbabwemi qinerseqqittariaqalerunarput
Taasisut 67 procentiisa kisereernerisa ersersippaat præsident Mugabe 42 procentiinik akerlilersortaalu Tsvangirai 49 procentiinik taaguunneqarsimasut.
Malittarisassallu malillugit qineqqusaartup arlaannaataluunniit taasisut affaat pissarsiarinngippagit taasisitsisoqaqqittariaqassaaq.
Qinersinermi nakkutilliisuutitat kisitsinerminni kigaalaarpallaarnerat naammagittaalliuutigineqarmat akiinnarsimapput naammagittartoqalaaqqullugu. Nakkutilliisunut isornartorsiuisuupput præsidentimut akerliliuttut, nunanit allanit nakkkutilliisuutitat nunallu allat naalakkersuisui.
Annilaangatigineqarpoq ukiuni kingullerni 28-ni præsidentiusimasup Robert Mugabep malittaasa qinersineq peqquserluffigileraluttuaraat, Mugabe præsidentiuinnaqqullugu. Illuatungiliuttut oqaaseqartartuata erseqqissaatigaa namminneq kisitsinertik naapertorlugu Mugabep taaneqarneranit marloriaammik Morgan Tsvangirai taaguunneqarsimasoq.
