Zimbabwemi illuatungiliuttut naalakkersuisoqataassapput
Inatsisartuni 210-nik ilaasortaqartuni 184-it akuersillutik taasinerisigut inatsisissaq akuersissutigineqarpoq.
Illuatungiliuttut siuttuat Morgan Tsvangirai-p partia MDC inatsisartuni 100-nik ilaasortaatitaqarpoq, Robert Mugabellu partia Zanu-PF 99-inik ilaasortaatitaqarluni. Taamaattumik naalakkersuisoqatigiinnik pilersitsinissaq pisariaqartinneqarpoq, inatsisartunilu ilaasortat tamarmik taasinerup inernera nuannaarutigisorujussuuaat, qiimmattarlutik natermullu tukkarlutik.
Naalakkersuisunngortuni Tsvangirai ministeriuninngussaaq, Mugabelu præsidentiuinnassalluni. Taannami siorna juunimi præsidentissarsiorluni aappassaanik qinersinermi, MDC-mit peqataaffigineqanngitsumik, qinigaaqqikkami.
Zimbabwe, siornatigut Afrikami nunani pisuunerpaallunilu ingerlalluarnerpaasimasoq, aningaasarsiornikkut innuttaasullu akornanni ajornartorsiortorujussuuvoq. Aningaasat nalikilliartornerat 231 millionit procentiuvoq. Naalagaaffiillu Peqatigiit oqaatigaat suliffissaaleqineq 94 procentiusoq. Tamakkulu qaavisigut maanna koleramik nappaalanersuaqarpoq.