Zimbabwemi arfininngorpat kisitseqqittoqassaaq

Zimbabwemi qinersinermi ataatsimiititaliap maanna piumasaraa qinersivinni arlalinni taasinernik kisitsisoqaqqinnissaa, tamannali illuatungiliuttut akerlerigaat, Danmarkip Radioatigut oqaatigineqarpoq.

Nunani killerni naalakkersuisut, inuit pisinnaatitaaffii pillugu suliniaqatigiiffiit nunarsuarmilu eqqarsaqatigiittartoqatigiit neriussimagaluarput, Afrikap kujataani nunat siuttuisa ataatsimiinneranni angusaqartoqassasoq, nalunaaquttalli akunnerini aqqaneq-marlunni ataatsimiinnerugaluaq, qinersinerup inernerinik takkuttussamik utaqqimaaqqusiviuginnarpoq. Qinersinermi malittarisassat, taasinerit kisinnerisa inernerinik piaartumik saqqummiussinissamik imaqartut, Zimbabwep præsidentianit Mugabemit maleqquneqaraluarput.

Zimbabwemi qinersinermut atatillugu ataatsimiititaliaq ullaap tungaani aalajangerpoq, præsidentissamut qinersinermi taasinerit qinersivinni 23-ini arfininngorpat kiseqqinneqassasut.

Mugabe-p partiiata qinersivinni 22-ini inernerit apeqqusersimavai, illuatungiliuttullu partiiata qinersivimmi ataatsimi taasinerit inerneri apeqqusersimallugit. Taamaakkaluartoq illuatungiliuttut kisitseqqinnissaq piumanngilaat, peqquserluttuliortoqaqinammat.

Inatsisartunut qinersinerup inerneri saqqummiunneqareerput, tassani paasinarsivoq illuatungiliuttut ajugaasimasut. Præsidentimulli qinersinerup inerneri suli saqqummiunneqanngillat. Maanna isumaqartoqalerpoq, illuatungiliuttuneersup Tsvangeraip taasisai ima ikitsigisimasut, allaat qinerseqqittoqartariaqalissalluni.

Illuatungiliuttut eqqartuussivimmut qullermut iliuuseqaqqusillutik saaffiginnereerput, suli kinguneqanngitsumik.