Zardari Pakistanimi præsidentitut qinerneqarpoq
Zardari præsidentinngornermigut ukiuni 53-ini inuunermini ilaatigut artornartaqisumi, parnaarussaasarsimavormi, maanna præsidentip illorsuanut Islamabad-imiittumut isertertussanngorpoq.
Pakistanimi aatsaavissuaq demokrati tunngavigalugu præsidentimut qinersisoqarpoq, taamaalillunilu kisermaassilluni naalakkersuisuusarneq unitsinneqarluni.
Taasinernik kisitsinerup takutippaa Pakistanip inatsisartuini inissani 702-usuni 458-t Zardarip partiiatalu pissarsiarigai.
- Zardarimut partiianullu Pakistanimi Folkepartimut PPP-mut una ajugaanerinnaanngilaq aammali ministeriunerusimasup Benazir Bhuttop demokrati, tamat oqartussaaqataanerat, tunngavigalugu ingerlatsinissamik sinnattuata ajugaaneraa, Bhuttop oqaaseqartartorisimasaa Farzana Raja oqarpoq.
Benazir Bhutto siorna decembarip ulluisa 27-ianni toqutaavoq.
Nuleernerata Zardarip præsidentinngornermigut taarsissavaa Pervez Musharraf sakkutuut naalagaattut pissaanermik 1999-imi tigusinermigut, nunap ingerlaneranik sequmiilluinnarsimasoq, tamannalu pillugu aggustimi tunuartariaqalersimasoq.
