Zakorat Zeeb: Ujalorsuakka kittorarsimanngillat
![](/sites/default/files/styles/image_934x467/public/article_images/g44_-_ub68.jpg?itok=E_5efMEK)
Suli nalunarallarpoq Zakorat Zeeb angutit arsaallutik pissartanngorniunneranni arsaqataaqqissanersoq. Taassuma marlunngornermi unnukkut seeqquni qipisoortillugu kingornalu napparsimmaviliaanneqarluni.
- Qujanartumik seeqquma ujalorsua kittorarsimanngilaq. Taanna assut erngumagigaluarakku. Nakorsaq oqarpoq ujalora tasissimasoq qujanartumilli ujallunik kittorartoqarsimanngilaq, Zakorat Zeeb KNR-mut oqarpoq.
Zakorat Zeebip Upernavimmiullu UB-83-imeersup arsamut siulliuniunneranni Zakorat Zeeb annerpoq.
- Arsaariaraluarakku kisianni taava seeqqora ilummut qipigami, Zakorat Zeeb ippassaq annernini arsaannerup minutsit tallimat sinnerlugit unikkallarneranik kinguneqartoq pillugu oqarpoq.
- Taama pisoqarnerani ilisimajunnaarpunga aatsaallu napparsimavimmi silattoqqillunga, oqarpoq.
Zakorat Zeebip seeqquani ujalorsuaq ukiut marluk matuma siorna Nuummi semifinalertoqarnerani kittorarpoq maannali taama ajortigisumik pisoqanngilaq.
Kisianni siukkaq malunniuteqarluartoq G-44-kkut amigaatigissaqaat unamminerit sinneruttut peqataasinnaajunnaassappat. Kisianni siorna G-44 pissartanngorpoq Zakorat Zeeb peqataanngitsoq taamani sølvinnattunut B-67-mut taanna arsaqataammat.
- Kisianni peqataasinnaajunnaassaguni malunnassaqaaq. Saassussisarnitsinni initoorujussuugami maqaasinassooq, G-44-mi anføreri Nukannguaq Zeeb Zakoratip angajua KNRmut oqarpoq.
- Kisianni pikkorissunik suli arsartoqarpugut neriuppugutllu GM-mi angusarissaarsinnaalluta arsaqataajunnaassagaluarpalluunniit, anforer oqarpoq.
G-44p unnugu FC Malamuk unammissavaa unamminerlu taanna KNR-TV-kkut aallakaatinneqassaaq nalunaaqutaq 20.00.
Aajuna Zakorat Zeeb-ip ajoqusernerani video.